தூத்துக்குடியில் பாராட்டு விழா: டி.எம்.சவுந்தரராஜனுக்கு தங்கக்குரலோன் விருது

தூத்துக்குடி மாவட்ட டாக்டர் டி.எம்.சவுந்திரராஜன் பாடல் மன்றம் சார்பில் பிரபல பின்னணி பாடகர் டி.எம்.சவுந்தரராஜனுக்கு பாராட்டு விழா நடைபெற்றது.

தூத்துக்குடி மாவட்ட டி.எம்.சவுந்தரராஜன் பாடல் மன்ற தலைவர் கோவிந்தராஜ் தலைமை தாங்கினார். தூத்துக்குடி மாநகராட்சி ஆணையாளர் மதுமதி முன்னிலை வகித்தார். டி.எம்.சவுந்தரராஜனின் மகன்கள் செல்வக்குமார், பால்ராஜ் ஆகியோர் பல்வேறு பாடல்களை பாடி ரசிகர்களை மகிழ்வித்தனர். அப்போது ஏராளமான மக்கள் திரளாக சென்று டி.எம்.சவுந்தரராஜனுக்கு சால்வை அணிவித்து வாழ்த்தினர்.

விழாவில் டி.எம்.சவுந்தரராஜனுக்கு தங்கக் குரலோன் விருதை மன்ற தலைவர் கோவிந்தராஜ், சீலன், ஜோசப் ஆகியோர் வழங்கினர்.

டி.எம்.சவுந்தரராஜன் பேசுகையில், இந்த விழாவுக்கு நீண்ட நாட்களாக அழைத்து கொண்டே இருந்தார்கள். தற்போது தான் இங்கு வர முடிந்தது. மக்கள் என்மீது இவ்வளவு அன்பு வைத்து இருப்பார்கள் என்று நான் எதிர்பார்க்கவில்லை. இங்கு மக்களை பார்க்கும் போது மிகவும் சந்தோசமாக உள்ளது என்றார்.