டெல்லியில் சுஷ்மா சுவராஜ் வீட்டு முன் இளைஞர் காங்கிரசார் போராட்டம்

ஜக்கிய முற்போக்கு கூட்டணி கட்சி தலைவர் சோனியா காந்தியை பாராளுமன்றத்தில் விமர்சனம் செய்து பேசிய எதிர்க்கட்சி தலைவர் சுஷ்மாசுவராஜை கண்டித்து டெல்லி ஜப்தர்சங் லேன் பகுதியில் உள்ள அவரது வீட்டு முன் இளைஞர் காங்கிரஸ் கட்சியினர் திடீர் போராட்டத்தில் ஈடுபட்டனர்.

பகல் 1 மணி அளவில் அவரது வீட்டு முன் இளைஞர் காங்கிரஸ் கட்சியின் தேசிய தலைவர் ராஜீவ் சத்தேவ் தலைமையில் கட்சியினர் திரண்டு இந்த ஆர்ப்பாட்டத்தில் ஈடுபட்டனர். அப்போது அவர்கள் சுஷ்மாசுவராஜுக்கு எதிராக கோஷம் எழுப்பினார்கள்.

இதுபற்றிய தகவல் கிடைத்ததும் போலீசார் அங்கு விரைந்து சென்று அவர்களை அங்கிருந்து பிடித்து சென்றனர். சிறிது நேரத்துக்கு பின்னர் அவர்களை போலீசார் விடுவித்தனர். போராட்டம் குறித்து ராஜீவ் சத்தேவ் கூறுகையில் "பாராளுமன்றத்தில் எதிர்க்கட்சிகளின் கருத்துக்களை தெரிவிக்க தடுப்பதாக ஜக்கிய முற்போக்கு கூட்டணி தலைவர் சோனியாகாந்தி மீது குற்றம்சாட்டியதை கண்டித்தும், காங்கிரஸ் உறுப்பினர்களை அவர் தூண்டி விட்டு சபையில் அமளி ஏற்படுத்துவதாக கூறிய அவரது இந்த இரட்டை பேச்சை கண்டித்து ஆர்ப்பாட்டம் நடத்தினோம்" என்றார்.