சுசீந்திரன் படம் - யுவன் இல்லை

சுசீந்திரனின் நான் மகான் அல்ல, விரைவில் வெளியாகவிருக்கும் காதல் செய்ய விரும்பு படங்களுக்கு யுவன் ஷங்கர் ராஜாதான் இசை. நான் மகான் அல்ல படத்தின் வெற்றிக்கு யுவனின் பாடல்களும் இசையும் பிரதான காரணம். ஆனால்...

விஷாலை வைத்து இயக்கும் பாண்டிய நாடு படத்தில் யுவன் ஷங்கர் ராஜா இல்லை. பதிலாக இசையமைப்பவர் டி.இமான்.

பாண்டிய நாடு படத்தை விஷால் தனது விஷால் ஃபிலிம் ஃபேக்ட‌ரி சார்பில் தயா‌ரித்து நடிக்கிறார். ஹீரோயின் லட்சுமி மேனன். மதுரை பின்னணியில் நடக்கும் ஆக்சன் கதை. மே பாதியில் படப்பிடிப்பை தொடங்க இருக்கிறார்கள். தற்போது விஷால் பூபதி பாண்டியனின் பட்டத்து யானையில் நடித்து வருகிறார். சுந்தர் சி. இயக்கத்தில் அவர் நடித்திருக்கும் மத கஜ ராஜா அனைத்து வேலைகளும் முடிந்தும் இன்னும் வெளியாகாமலிருப்பது குறிப்பிடத்தக்கது.

விஷாலின் சமர் படத்துக்கு யுவன் இசையமைத்திருந்தார். படத்தின் தோல்வி குறித்து பேசிய தயா‌ரிப்பாளர் யுவன் மலேசியாவில்தான் பாடல் கம்போஸ் செய்வேன் என்று அடம்பிடித்து மலேசியா சென்று, தனது சொந்த வேலைகளை கவனித்தார், அதுதான் பாடல்கள் படத்தில் வெற்றி பெறவில்லை என்று கூறியிருந்தது முக்கியமானது.