சத்தமில்லாமல் அங்காடித்தெரு 100வது நாள் கொண்டாட்டம்!

சென்னை போன்ற ‌பெருநகரங்களில் இருக்கும் பிரமாண்ட ஜவுளி, நகை உள்ளிட்ட ஷோரூம்களில் பணிபுரியும் அடிமட்ட ஊழியர்களில் வாழ்வியல் பிரச்னைகளை தோலுரித்துக் காட்டிய அங்காடித்தெரு படம் ரசிகர்களின் ஏகோபித்த ஆதரவுடன் வெற்றி பெற்றுள்ளது.

100 நாட்களை கடந்து ஓடிக் கொண்டிருக்கும் இப்படத்தில் நாயகனாக புதுமுகம் மகேஷும், நாயகியாக அஞ்சலியும் நடித்திருந்தனர். இவர்களது நடிப்பு டைரக்டர் வசந்தபாலனின் இயக்கத்திற்கு மேலும் வலு சேர்த்தது. வித்தியாசமான மையக்கருவுடன் உருவான இப்படத்தினை ஐங்கரன் நிறுவனம் தயாரித்து வெளியிட்டது.

பத்து நாட்கள் படம் ஒடினாலே பிரமாண்ட விழா எடுக்கும் தமிழ் திரையுலகில் அங்காடித்தெருவின் 100வது நாள் விழாவை சத்தமில்லாமல் கொண்டாடியிருக்கிறது அங்காடித்தெரு டீம்.

காஞ்சிபுரத்தில் உள்ள ஸ்ரீநாராயணமூர்த்தி தியேட்டர் சார்பில் ஏற்பாடு செய்யப்பட்டிருந்த இந்த நிகழ்ச்சியில் தயாரிப்பாளர் அருண்பாண்டியன், டைரக்டர் வசந்தபாலன், நாயகன் மகேஷ், நாயகி அஞ்சலி, பாண்டி மற்றும் படக்குழுவினர் கலந்து கொண்டு, அங்காடித்‌தெரு அனுபவங்களை பகிர்ந்து கொண்டனர்.