ஜெ.வுடன் விஜய், அஜீத் சந்திப்பு!

தென் சென்னை மாவட்ட முன்னாள் அதிமுக செயலாளர் சைதை துரைசாமி மகன் திருமண வரவேற்பு நிகழ்ச்சியில் தமிழ்த் திரையுலகின் இளம் சூப்பர் ஸ்டார்களான அஜீத் மற்றும் விஜய்யுடன் அதிமுக பொதுச் செயலாளர் ஜெயலலிதா சிறிது நேரம் பேசி இருவரையும் வாழ்த்தினார்.

துரைசாமி மகன் வெற்றி துரைசாமிக்கும், திருப்பூரை சேர்ந்த செல்வராஜ்-மல்லிகா தம்பதியினரின் மகள் வசுந்தராவுக்கும் கடந்த 12-ந் தேதி கரூரில் திருமணம் நடந்தது.

அவர்களது திருமண வரவேற்பு நிகழ்ச்சி சென்னை நந்தனம் ஒய்.எம்.சி.ஏ. வளாகத்தில் உள்ள மைதானத்தில் நேற்று மாலை நடந்தது. இதில் ஜெயலலிதா நேரில் கலந்து கொண்டார். இதற்காக கொடநாட்டிலிருந்து அவர் சென்னை வந்திருந்தார்.

அதேபோல மதிமுக பொதுச் செயலாளர் வைகோ தனது மனைவியுடனும், பாமக நிறுவனர் டாக்டர் ராமதாஸ், மூத்த கம்யூனிஸ்ட் தலைவர்கள் நல்லகண்ணு, ஜி.ராமகிருஷ்ணன், பாஜக தலைவர் இல.கணேசன் உள்ளிட்டோரும் கலந்து கொண்டனர்.

நிகழ்ச்சியில் நடிகர் அஜீத் தனது மனைவி ஷாலினியுடன் வந்திருந்தார். அதேபோல விஜய்யும் வந்திருந்தார். ஜெயலலிதாவைப் பார்த்த அஜீத் தனது மனைவியுடன் சென்று ஜெயலலிதாவை வணங்கி காலில் விழுந்து ஆசி பெற்றார். பின்னர் சிறிது நேரம் இருவரும் ஜெயலலிதாவுடன் பேசினர்.

நிகழ்ச்சியில் கலந்து கொண்டு கிளம்பிய ஜெயலலிதா காரில் ஏறிய பிறகுதான் விஜய்யைப் பார்த்தார். உடனடியாக அவரை அருகில் அழைத்து நலமா என்று விசாரித்தார். பின்னர் அவருக்கு வாழ்த்து தெரிவித்து விட்டுக் கிளம்பினார்.