டப்பிங் பேச மாட்டேன்… – அம்புலி பார்த்திபன் அழிச்சாட்டியம்

ஏழு மலை தாண்டி புலிப்பால் குடிப்பதற்கு சமம் ஆகிவிட்டது சினிமா எடுப்பதிலிருக்கிற கஷ்டம். (டாக்டர் சீனிவாசன் போன்ற பவர் ஸ்டார்களையெல்லாம் இதில் சேர்க்காதீர்களய்யா) வித்தகன் என்ற படத்தை இயக்கிக் கொண்டிருக்கும் பார்த்திபனுக்கு மற்றவர்களை விட இது நன்றாகவே புரியும். அப்படிப்பட்டவர் ஏன் இப்படி நடந்து கொள்கிறார் என்று துடிக்கிறார்கள் விஷயத்தை கேள்விப்பட்டவர்கள்.

என்னவாம்?

அம்புலி படத்தில் டப்பிங் பேச வந்தவர், சொல்லாமல் கொள்ளாமல் கிளம்பி விட்டாராம். காரணம், பார்த்திபனேதான். இதென்ன புரியாத புதிராக இருக்கிறதே என்பவர்களுக்கு முதலில் இருந்தே கதையை கிளறினால்தான் புரியும்.

அம்புலி என்ற 3டி படத்தில் ஒரு கவுரவ வேடத்தில் நடித்திருக்கிறார் பார்த்திபன். படப்பிடிப்பில் இவர் கொடுத்த குடைச்சல் பொறுக்காமல் இவருக்கு பதிலாக டூப் வைத்து பல காட்சிகளை எடுத்துவிட்டார்கள். படமே அரையிருட்டில் நடப்பதுதான் என்பதால் இந்த டூப் சமாச்சாரம் அவ்வளவாக வெளியில் தெரியாதாம். டப்பிங் பேச வந்த பார்த்திபன், தான் நடிக்காத காட்சிகளையெல்லாம் பார்த்து பேஸ்த் அடித்துப் போனாராம். சட்டென்று பாதியிலேயே வெளியேறிவிட்டார்.

எங்கு போய் புகார் கொடுப்பது என்று விழிபிதுங்கி போயிருக்கிறார்களாம் அம்புலி கோஷ்டியினர். ஏனென்றால் தயாரிப்பாளர் சங்க பிரச்சனையேதான் தனி எபிசோடாக ஓடிக் கொண்டிருக்கிறதே?