‘அங்காடித் தெரு’வுக்கு புதுச்சேரியில் விருது

புதுவையில் நடந்த இந்திய திரைப்பட விழாவில் சிறந்த படத்துக்கான விருது ‘அங்காடித் தெரு’ படத்துக்கு வழங்கப்பட்டது. புதுவை அரசின் செய்தி மற்றும் விளம்பரத்துறை, நவதர்சன் திரைப்பட கழகம் மற்றும் அலையன்ஸ் பிரான்சே ஆகியவை இணைந்து நடத்தும் இந்திய திரைப்பட விழா, புதுவையில் நேற்று தொடங்கியது. சுய்ப்ரேன் வீதியில் உள்ள அலையன்ஸ் பிரான்சேஸ் திரையரங்கில் துவக்க விழா நடைபெற்றது.

செய்தி மற்றும் விளம்பரத்துறை இயக்குநர் செல்வராஜ் வரவேற்றார். லட்சுமி நாராயணன் எம்எல்ஏ, அலையன்ஸ் பிரான்சே தலைவர் டாக்டர் நல்லாம், நவதர்சன் திரைப்பட கழக தலைவி சாயிகுமாரி ஆகியோர் வாழ்த்தி பேசினர். முதல்வர் ரங்கசாமி சிறப்பு விருந்தினராக கலந்து கொண்டு விழாவை தொடங்கி வைத்தார்.

2010ம் ஆண்டின் சிறந்த படத்துக்கான விருதுக்கு ‘அங்காடித் தெரு’ படம் தேர்வானது. இயக்குநர் வசந்தபாலனுக்கு ரங்கசாமி விருது வழங்கினார். அவருக்கு சங்கரதாஸ் சுவாமிகள் விருதையும், பரிசுத்தொகையாக ரூ.50 ஆயிரத்தையும் முதல்வர் வழங்கி பாராட்டினார்.

நல்லதுதான்..! ஆனாலும் இந்த விருது கொஞ்சம் ஸ்லோதான்!!