வெற்றிமாறன், சீனு ராமசாமி மனு – சேராமலே முடிந்த சோகம்

தமிழா இன உணர்வு கொள்… தெருவுக்கு தெரு எழுதி போட்டாலும், சிலருக்குதான் அந்த உணர்வு ரத்தத்தில் மிதக்கிறது. அப்படி மிதக்கிற இருவராக தன்னை முன்னிலை படுத்திக் கொண்ட இரு இயக்குனர்கள் ஏமாந்து திரும்பிய சம்பவம்தான் நாம் சொல்லப் போவது.

கடந்த வாரம் டில்லியில் நடந்த விருது வழங்கும் விழாவுக்கு சென்றிருந்தார்கள் இயக்குனர்கள் வெற்றிமாறனும், சீனு ராமசாமியும். இந்திய ஜனாதிபதி பிரதீபா பாட்டீல் கைகளால் தங்கள் படமான ஆடுகளம், மற்றும் தென்மேற்கு பருவக்காற்றுக்காக இந்த விருது அவர்களுக்கு அறிவிக்கப்ப்டடிருந்தது.

போகும்போதே தங்கள் சட்டை பையில் ஒரு மனு எழுதி வைத்திருந்தார்களாம். அதை குடியரசு தலைவர் கைகளில் கொடுப்பதுதான் இவர்களின் நோக்கம். மரண தண்டனையை சந்திக்கப் போகும் ராஜீவ் கொலை வழக்கு கைதிகளான சாந்தன், முருகன், பேரறிவாளன் ஆகிய மூவரின் மரண தண்டனையை ரத்து செய்ய வேண்டும் என்கிற மனுதானாம் அது.

ஆனால் இவர்களை சோதித்த பாதுகாப்பு அதிகாரிகள் அந்த கடிதத்தை பறிமுதல் செய்துதான் மேடைக்கே அனுப்பினார்களாம். கொடுக்க வாய்ப்பில்லை என்றாலும், ஏதோ அந்த உணர்வாவது வந்ததே, அதற்காக பாராட்டலாம்.