சூட்டிங் ஸ்பாட்டில் ஜெனரேட்டரில் வெளிவந்த புகையால் மூச்சு திணறி கேமராமேன் பலி!

கொடைக்கானலில் சினிமா சூட்டிங்கின்போது, ஜெனரேட்டரில் இருந்து வெளியான புகையால் மூச்சுத்திணறி படத்தின் கேமராமேன் பலியானார். மேலும் ஹீரோயின் உட்பட 6பேர் மயக்கமானார்கள். ‌முற்றிலும் புதுமுகங்களை வைத்து, கலைமாமணி என்பவர் “143/144″ என்ற புதிய படம் ஒன்றை இயக்கி வருகிறார். இப்படத்தின் சூட்டிங் கடந்த 9ம் தேதி முதல் கொடைக்கானல் பகுதிகளில் நடந்து வருகிறது. கொடைக்கானல் நாயுடுபுரத்தில் உள்ள ஒரு தனியார் ஓட்டலில் நேற்று மாலை நடந்து கொண்டு இருந்தது. படக்குழுவினர் 55 பேர் இந்த படப்பிடிப்பில் ஈடுபட்டனர். சூட்டிங் வசதிக்காக ஜெனரேட்டர் இயக்கப்பட்டு இருந்தது.

இந்நிலையில் சூட்டிங் தொடங்கிய சிறிது நேரத்தில் மழை பெய்தது. இதனால் ஜெனரேட்டரை அங்குள்ள அறைபகுதிக்கு கொண்டு சென்றனர். அப்போது ஜெனரேட்டரில் இருந்து வெளியேறிய அதிக அளவு புகை அறைகளுக்குள் பரவியது. இதனால் அறை முழுவதும் புகை மண்டலமாக மாறியது. இந்த புகையால், சென்னை பள்ளிக்கரணை தேவி மாரியம்மன் கோவில் பகுதியை சேர்ந்த படத்தின் கேமராமேன் ஜான்பால் என்பவருக்கு மூச்சுத்திணறல் ஏற்பட்டு சம்பவ இடத்திலேயே பரிதாபமாக பலியானார். மேலும் கதாநாயகி உள்ளிட்ட 6 பேரும் மயக்கமடைந்து, கொடைக்கானலில் உள்ள ஒரு தனியார் மருத்துவமனையில் சிகிச்சைக்காக அனுமதிக்கப்பட்டனர். அங்கு அவர்களுக்கு சிகிச்சை அளிக்கப்பட்டு வருகிறது.

சூட்டிங் ஸ்பாட்டில் கேமராமேன் பலியான சம்பவத்தால் சூட்டிங் நிறுத்தப்பட்டது. இச்சம்பவம் குறித்து கொடைக்கானல் போலீசார் வழக்குப்பதிவு செய்து விசாரணை நடத்தி வருகின்றனர். பலியான கேமராமேன் ஜான்பாலின் உடல் பிரேத பரிசோ‌தனைக்காக அனுப்பி வைக்கப்பட்டுள்ளது.