அதிர்ச்சியில் சினிமா தொழிலாளர்கள்!

பெப்சி தொழிலாளர்களின் சம்பள உயர்வு என்பது, சங்கச் சட்டப்படி மூன்று ஆண்டுகளுக்கு ஒருமுறை, தயாரிப்பாளர் சங்கம், தொழிலாளர் சங்கம் ஆகிய இருதரப்பு பேச்சு வார்த்தைக்கு பின்பு உயர்த்தி வழங்கப்பட்டு வருகிறது. இதன்படி இந்த ஆண்டின் தொடக்கத்திலேயே புதிய சம்பள உயர்வு கொடுத்திருக்க வேண்டும். ஆனால் இதில் தீர்வு எட்டப்படாத நிலையில் தமிழ் திரைப்பட தயாரிப்பாளர் சங்கத்தினர், பெப்ஸி அமைப்பினரோடு தொழிலாளர்களின் சம்பள உயர்வு குறித்து தொடர்ந்து பேசி வந்தார்கள்.

அதற்குள் தயாரிப்பாளர் சங்கத்திற்கு தேர்தலும் வந்தது. புதிய நிர்வாகிகள் தேர்ந்தெடுக்கப்பட்டவுடன் இந்த பேச்சு வார்த்தை மீண்டும் சூடு பிடிக்க ஆரம்பித்திருக்கிறது. ஆனால் இந்த முறை சற்று வித்தியாசத்துடன்.

ரஜினி, கமல் நடிக்கும் படங்களில் வேலை பார்க்கும் ஊழியர்களுக்கும் ஒரே பேட்டா…! ஐம்பது லட்சங்களில் எடுக்கப்படும் படங்களுக்கும் அதே பேட்டா என்றால் எப்படி சகித்துக் கொள்வது? இந்த முறையை முதலில் அகற்ற வேண்டும் என்று பேசி முடிவெடுத்திருக்கிறார்கள்.

இதன்படி ரஜினி, கமல், அஜீத், விஜய், விக்ரம், சூர்யா, விஷால் , சிம்பு ஆகிய பெரிய ஹீரோக்கள் நடிக்கும் படங்களை முதல் பிரிவாகவும், தனுஷ், ஆர்யா, மாதவன் போன்ற ஹீரோக்கள் நடிக்கும் படங்களை இரண்டாவது பிரிவாகவும்,

புதுமுகங்கள் மற்றும் அதற்கு இணையான நடிகர்கள் நடிக்கும் படங்களை மூன்றாவது பிரிவாகவும் பிரிக்கலாம் என்று முடிவாகியிருக்கிறதாம். அந்தந்த படங்களின் பட்ஜெட், ஹீரோவுக்கான வியாபாரம் ஆகியவற்றை கணக்கில் கொண்டு, மூன்று விதமாக நிர்ணயிக்கப்படும் ஊதியம்தான் இனி வழங்கப்படுமாம்.

மூன்றாவது பிரிவான கடைசி பிரிவுக்கு இன்னும் சலுகை. மிக குறைந்த அளவு ஊழியர்களை கூட படப்பிடிப்புக்கு பயன்படுத்திக் கொள்ளலாமாம். முன்பு இந்தமுறை இல்லை. சிறுபட்ஜெட் படம் என்றாலும் குறைந்தது அறுபது பேரையாவது பயன்படுத்த வேண்டும் என்ற பெப்சி தொழிலாளர்களின் பணி நிபந்தனை இருந்து வந்தது.

இந்தபுதிய முறை சிறிய முதலீட்டில் படம் தயாரிப்பாளர்களுக்கு அனுகூலமாக இருந்தாலும், தொழிலாளர்களுக்கு துரோகம் இழைக்கபடுவதாக பெப்சி தரப்பில் அதிர்ச்சி அடைந்து இருகிறார்களாம்!

எல்லோருக்கும், எப்போதும், ரஜினி , கமல், விஜய் போன்ற பெரிய ஹீரோக்களின் படங்களில் வேலை கிடைக்காது என தொழிலாளர்கள் தரப்பில் அதிருப்தி வெளிபடுத்தி வருகிறார்கள். இதனால் எந்தநேரத்திலும் திரையுலகில் வேலை நிறுத்தம் வரலாம் என்கிறார்கள்.