நட்சத்திர கிரிக்கெட்: 2வது முறையாக சென்னை சாம்பியன்!!

சினிமா நட்சத்திரங்களுக்கான சி.சி.எல்., எனப்படும் செலிபிரெட்டி
கிரிக்கெட் லீக் கோப்பையை, நடிகர் விஷால் தலைமையிலான சென்னை ரைனோஸ் அணி
2வது முறையாக கைப்பற்றி சாதனை படைத்தது. சினிமா நட்சத்திரங்களுக்கான 20
ஓவர் கிரிக்கெட் போட்டி கடந்த ஆண்டு முதல் நடந்து வருகிறது. அதேபோல்
இந்தாண்டும் நட்சத்திர கிரிக்கெட் போட்டிகள் கடந்த மாதம் துவங்கியது. இதில்
சென்னை ரைனோஸ் (கோலிவுட்), மும்பை ஹீரோஸ்(பாலிவுட்), கர்நாடக
புல்டோசர்ஸ்(சாண்டல்வுட்), கேரளா ஸ்டைகர்ஸ்(மாலிவுட்), தெலுங்கு
வாரியர்ஸ்(டோலிவுட்), பெங்கால் டைகர்ஸ்(பெங்கால் சினிமா) ஆகிய 6 அணிகள்
மோதின. பல்வேறு கட்ட போட்டிகளுக்கு பின், இறுதி போட்டிக்கு நடிகர் விஷால்
தலைமையிலான சென்னை ரைனோஸ் அணியும், கன்னட நடிகர் சுதீப் தலைமையிலான கர்நாடக
புல்டோசர்ஸ் அணியும் தகுதிபெற்றன.
ஐதராபாத்தில் நேற்று நடந்த இறுதிபோட்டியில் டாஸ் வென்று, முதலில்
களமிறங்கிய சென்னை அணி நிர்ணயிக்கப்பட்ட 20 ஓவரில் 4விக்கெட் இழப்பிற்கு
161ரன்கள் குவித்தது. சென்னை சார்பாக அதிரடியாக விளையாடிய விக்ரகாந்த்
14பவுண்டரி, 1சிக்ஸர் உட்பட ஆட்டமிழக்காமல் 95ரன்கள் குவித்தார்.
இத‌னையடுத்து 162 ரன்களை வெற்றி இலக்காக கொண்டு களம் இறங்கிய கர்நாடக அணி,
ஆரம்பத்தில் சற்று தடுமாறியது. பின்னர் அந்த அணியின் துருவ், கார்த்திக்
அரைசதம் அடித்து அணியை வலுப்படுத்தினர்.

கடைசி ஓவரில் வெற்றிக்கு 10ரன்கள் இருந்த நிலையில், விக்ராந்த் பந்து
வீசினார். அவரின் துல்லியமான பந்துவீச்சில் வெறும் 8 ரன்கள் மட்டுமே விட்டு
கொடுத்து, 3 விக்கெட்டுகளையும் வீழ்த்தினார். இதன்மூலம் சென்னை ரைனோஸ் அணி
1 ரன் வித்யாசத்தில் த்ரில் வெற்றி பெற்று, 2வது முறையாக கோப்பையை
கைப்பற்றியது. பேட்டிங் மற்றும் பவுலிங்கில் அசத்திய விக்ராந்த் ஆட்ட
நாயகன் விருதை பெற்றார்.

கடந்த ஆண்டும் இதே கர்நாடக அணியை வீழ்த்தி தான் சென்னை அணி கோப்பையை கைப்பற்றியது என்பது குறிப்பிடத்தக்கது.