இடைவிடாமல் 6 ஆண்டுகளாக ‘வீடியோ கேம்’ விளையாடும் இளைஞர்

தற்போதைய இளைஞர்கள், சிறுவர்களை ‘வீடியோ கேம்’ விளையாட்டு வெகுவாக ஆட்டிப் படைக்கிறது. சிலர் இதிலிருந்து மீள முடியாமல் அடிமையாகி விடுகிறார்கள். அதுபோல சீனாவின் வடக்குப்பகுதியில் அமைந்துள்ள ஜிலின் நகரில் ஒரு இளைஞர் சுமார் 6 ஆண்டுகளாக வீடியோ கேமில் மூழ்கி கிடக்கிறார். அவருடைய பெயர் லீ வியாங் (30). அங்குள்ள வீடியோ கேம் மையத்திலுள்ள ஒரு குறிப்பிட்ட இருக்கை தான் அவருக்கு நாள் முழுவதும் புகலிடம். குளியல் அறை, கழிவறைக்கு செல்லும் நேரம் தவிர, விளையாடுவது, சாப்பிடுவது, தூங்குவது எல்லாம் இந்த இருக்கையில் தான் அவர் கழிக்கிறார்.

இது பற்றி அந்த விளையாட்டு மையத்தின் நிர்வாகி கூறுகையில், ‘இந்த இளைஞரால் எங்களுக்கு எவ்வித பிரச்சினையும் இல்லை. கம்யூட்டரில் ஏதாவது பிரச்சினை ஏற்பட்டால் மட்டுமே அவர் இருக்கையை விட்டு வெளியேற்றுவோம்’ என்கிறார். இந்த விளையாட்டிற்காக இளைஞர் லீ வியாங் மாதம் தோறும் வாடகையாக ரூ.4,800 மற்றும் வீடியோ கேம் கட்டணமாக ரூ.16 ஆயிரம் செலுத்துகிறார்.