ஆக்ஷன் நடிகராகவே தொடர்ந்து நீடிக்க விருப்பம்: துப்பாக்கி பட நடிகர் வித்யுத் பேட்டி

அஜித் நடித்த பில்லா 2 வில் அறிமுகமான வித்யுத் ஜம்வால் தான் ஆக்ஷன் ஹீரோவாக மட்டுமே நடிக்க தான் விரும்புவதாக கூறி உள்ளார்.

அஜித் நடித்த பில்லா 2 திரைப்படமே தமிழில் இவருக்கு முதல் படம். அதனை அடுத்து விஜய் நடித்த துப்பாக்கி திரைப்படத்திலும் இவரது ஆக்ஷன் பலரை கவர்ந்தது. இது குறித்து பேட்டியளித்த வித்யுத் கூறும்போது, ஆக்ஷன் காட்சிகளில் உண்மையாக தோன்றி நடிக்கும் வித்யுத்தை படங்களில் நீங்கள் பார்ப்பீர்கள். என்னால் முடிந்த அளவிற்கு அத்தகைய காட்சிகளில் நான் நடிப்பேன். இது போன்ற ஆக்ஷன் படங்களில் நடிக்க நான் தயாராக இருக்கிறேன். இதனை செய்வதற்காகவே நான் பிறந்திருக்கிறேன் என்றார்.

ஆக்ஷனோடு கூடிய காதல், ஆக்ஷனோடு கூடிய காமெடி, ஆக்ஷனோடு கூடிய காட்சி அமைப்புகள் மற்றும் ஆக்ஷன் ஆகியவையே எனது வாழ்வின் பெரிய அங்கம் எனவும் அவர் தெரிவித்தார்.

திலீப் கோஷ் இயக்கத்தில் முன்னாள் மிஸ் இந்தியா பூஜா சோப்ரா நடிக்கும் கமாண்டோ படத்தில் வித்யுத் நடிக்கிறார். இந்த படம் ஏப்ரல் 12ந் தேதி ரிலீசாகிறது. அவர் அதில், உண்மையான சண்டை காட்சிகளில் நடித்துள்ளார். கேரளாவில் புகழ் பெற்ற களரி கலையில் இவர் சிறப்பான பயிற்சி பெற்றவர் என்பது குறிப்பிடத்தக்கது.