தீபாவளி ரிலீஸ் முனைப்போடு மணிரத்னத்தின் கடல் சூட்டிங் விறுவிறு…!

ராவணன் படத்திற்கு பிறகு மணிரத்னம் இயக்கி வரும் புதியபடம் கடல்.
இப்படத்தின் நாயகனாக கார்த்திக் மகன் – கவுதமும், அவருக்கு ஜோடியாக
சமந்தாவும் நடிக்கின்றனர். மேலும் கவுதமின் அப்பாவாக மணிரத்னத்தின் ஆஸ்தான
நாயகரான அரவிந்த்சாமி நடிக்கிறார். நீண்ட இடைவெளிக்கு பிறகு அரவிந்த்சாமி
நடிக்கும் படம் இது. ஏ.ஆர்.ரஹ்மான் இசையமைக்க, இயக்குநரும்,
ஒளிப்பதிவாளருமான ராஜீவ் மேனன் நீண்ட இடைவெளிக்கு பிறகு மணிரத்னம்
படத்திற்கு ஒளிப்பதிவு செய்கிறார். ஏற்கனவே ராஜீவ் மேனன் மணிரத்னத்தின்,
பம்பாய் மற்றும் குரு படங்களுக்கு ஒளிப்பதிவு செய்துள்ளார். இவர்கள்
இருவரும் இணையும் 3வது படம் “கடல்”.
ஹீரோ, ஹீரோயின் செலக்ஷ்ன், படத்தின் டைட்டில் பஞ்சாயத்து என கிட்டத்தட்ட
ஒரு ஆண்டாக இழுத்து வந்த கடல் படம், ஒருவழியாக கடந்த வாரம் திருச்செந்தூர்
அருகேயுள்ள மணப்பாடு என்ற கடற்கரை கிராமத்தில் தொடங்கி, தொடர்ந்து
நடைபெற்று வருகிறது. கிறிஸ்தவ தேவாலயங்கள் நிறைந்த, செம்மண் பகுதி
மணப்பாடாகும். ரொம்பவே அமைதியான சூழலில் எந்த ஒரு இடையூறும் இல்லாமல்
சூட்டிங்கை நடத்தி வருகிறார் மணிரத்னம். மேலும் படத்தின் பாடல் காட்சி
உள்ளிட்ட சில காட்சிகளை கடலில் வைத்து படமாக்கி வருகிறார் மணி, இதற்காக
ஹாங்காங்கில் இருந்து பிரத்யேகமான டெக்னீசியன்களை வரவழைத்துள்ளார்.
மணப்பாடு பகுதியில் சூட்டிங் முடிந்த கையோடு அடுத்தக்கட்ட படிப்பிடிப்பை
கேரளா மாநிலம், மூணாறில் நடத்த இருக்கிறார். “கடல்” படத்தை தீபாவளிக்கு
வெளியிடும் முனைப்போடு வேகமாக இயக்கி வருகிறார்.

மீனவர்களின் வாழ்வை மையப்படுத்தி உருவாகி வரும் கடல் படத்தில், ஒரு
அருமையான காதலையும், அத்தோடு த்ரில்லிங்கான கடத்தல் சம்பவங்களையும்
சேர்த்து இருக்கிறாராம் மணி.