ஜூலை 1-ம் தேதி துப்பாக்கி ட்ரைலர் – ஏ ஆர் முருகதாஸ்

ரசிகர்கள் பெரிதும் எதிர்ப்பார்க்கும் விஜய்யின் துப்பாக்கி படத்தின் ட்ரைலர் காட்சி வரும் ஜூலை 1-ம் தேதி வெளியாகிறது.

வரும் ஜூன் 22-ம் தேதி விஜய்யின் பிறந்த நாள் என்பதால், அவருக்கு சிறப்பு சேர்க்கும் வகையில் ட்ரைலர் வெளியாகும் என ரசிகர்கள் எதிர்ப்பார்த்தனர். ஆனால் பிறந்த நாளுக்கு 10 நாட்கள் கழித்துதான் ட்ரைலர் வெளியாகும் என முருகதாஸ் குறிப்பிட்டுள்ளார்.

விஜய், காஜல் அகர்வால் நடிக்க, ஹாரிஸ் ஜெயராஜ் இசையமைக்க, ஏ ஆர் முருகதாஸ் இயக்கும் படம் துப்பாக்கி. கலைப்புலி தாணு தயாரிக்கிறார்.

இந்தப் படம் விஜய் ரசிகர்களிடையே பெரும் எதிர்ப்பார்ப்பை ஏற்படுத்தியுள்ளது. படத்தின் ஒரு போஸ்டர் மட்டுமே வெளியாகியுள்ள நிலையில், படம் எப்படி இருக்கும் என ரசிகர்கள் நச்சரிக்க ஆரம்பித்துள்ளனர்.

எனவே படத்தின் முன்னோட்டக் காட்சியான ட்ரைலரை விஜய் பிறந்த நாளன்று வெளியிடக் கோரி வந்தனர்.

இதுகுறித்து முருகதாஸ் தனது ட்விட்டரில், “வரும் 22-ம் தேதி பெரிய படங்களெல்லாம் வெளியாகின்றன. அன்று துப்பாக்கி ட்ரைலர் வெளியிடுவது முடியாது. 10 நாட்களில் வெளியிட்டுவிடுவோம்,” என்று குறிப்பிட்டுள்ளார்.

வரும் ஆகஸ்ட் 15-ம் தேதி படம் வெளியாகும் என்று தெரிகிறது!