ஏழைகள் கல்விக்கு நிதி திரட்ட சூர்யா, விக்ரம், தனுஷ், திரிஷா ஆடைகள் ஏலம்

நடிகர், நடிகைகளின் ஜீன்ஸ் பேன்ட்களை ஏலம் விட்டு வறுமை கோட்டுக்கு கீழ் உள்ள ஏழை குழந்தைகளின் கல்விக்காக நிதி திரட்ட பரிக்ரமா என்ற தொண்டு நிறுவனம் ஏற்பாடுகள் செய்துள்ளது.

நடிகர், நடிகைகள் சினிமாவில் பயன்படுத்திய ஜீன்ஸ் பேன்ட்டில் கையெழுத்து போட்டு அனுப்பி வைக்குமாறு தனித்தனியாக கடிதங்கள் அனுப்பப்பட்டு உள்ளன. நடிகர்களின் மார்க்கெட்டு நிலவரப்படி ஏலத்தொகையை நிர்ணயித்து ஏலம் விட முடிவு செய்துள்ளார்கள்.எழுத்தாளர் ஷோபாடே இதை ஒருங்கிணைத்து செய்து வருகிறார்.

இந்தி, தமிழ், தெலுங்கு, மலையாளம், கன்னட நடிகர்-நடிகைகளின் ஜீன்ஸ் பேன்ட்களை ஏலத்தில் விட உள்ளனர். விக்ரம், சூர்யா, தனுஷ், மாதவன், திரிஷா ஆகியோர் ஜீன்ஸ் பேன்ட்களில் கையெழுத்திட்டு அனுப்பி வைத்துள்ளனர்.இந்தி சூப்பர் ஸ்டார் அமிதாப்பச்சனும் அனுப்பி உள்ளார்.

ரஜினிக்கும் சினிமாவில் பயன்படுத்திய ஜீன்ஸ் பேன்ட்டை அனுப்பி வைக்குமாறு கடிதம் அனுப்பப்பட்டு இருந்தது. ஆனால் அவரிடம் இருந்து பதில் வரவில்லை.

இதுகுறித்து தொண்டு நிறுவனத்தினர் கூறும்போது, ரஜினிக்கு கடிதம் அனுப்பியதும் நன்றி தெரிவித்து பதில் அனுப்பினார். ஆனால் இதில் சேர்வதற்கான ஒப்புதம் அவரிடம் இருந்து இதுவரை வரவில்லை என்றனர்.