ஏதாவது ஒரு வேடத்தில் ரஜினியுடன் நடிக்கணும்!- தமன்னா பிறந்த நாள் பேட்டி

மும்பை: நடிகை தமன்னா இன்று தனது 23 வது பிறந்த நாளை மும்பையில் கொண்டாடினார். பிறந்த நாள் ஸ்பெஷலாக நிருபர்களைச் சந்தித்து பேட்டியளித்தார். அந்தப் பேட்டியிலிருந்து… குறிப்பிட்ட வயது வரை பிறந்த நாள் என்பது கேக் வெட்டுவதற்காக மட்டும்தான் என்று நினைத்திருந்தேன். ஆனால் விவரம் தெரிந்ததிலிருந்து, அதை அர்த்தமுள்ளதாக மாற்றிக் கொண்டேன். நான் பிறந்த நாள் நாலு பேருக்காவது நல்லதாக அமைய வேண்டும் என்பதுதான் அந்த மாற்றம். ரொம்ப சின்ன வயதிலேயே நடிக்க வந்துவிட்டேன். இன்று என் சினிமா வாழ்க்கைக்கு வயது 8. இத்தனை ஆண்டுகளில் நான் சம்பாதித்த பணத்தில் ஒரு பகுதியை ஏழை மக்களுக்கு, நெருக்கடியில் இருப்பவர்களுக்கு உதவ செலவழித்து வருகிறேன். என் உதவிகள் எதையும் இதுவரை நான் வெளிச்சத்துக்கு கொண்டு வந்ததே இல்லை. அப்படி விளம்பரப்படுத்தினால் நான் செய்யும் உதவிகளுக்கு அர்த்தமிருக்காதே. இந்த சினிமாவில் எனக்கு யாரும் பெரிதாக உதவவில்லை. அதை ஒரு குறையாக சொல்லவில்லை. எந்த துறையாக இருந்தாலும் நாமாகத்தான் கஷ்டப்பட்ட நமக்கான இடத்தைப் பிடிக்க வேண்டும் என்பதற்காகச் சொல்கிறேன். சினிமாவை நான் எந்த அளவு நேசிக்கிறேன் என்பதை வார்த்தைகளில் சொல்ல முடியாது. அப்படியொரு காதல். மொழிகளைத் தாண்டி அனைத்து மொழி சினிமாவிலும் நடிக்க ஆசை. இந்தப் பிறந்த நாளில் எனக்கொரு ஆசை. விரைவில் ரஜினி சாருடன் ஏதாவது ஒரு ரோலில் நடிக்க வேண்டும் என்ற ஆசை உள்ளது. நடக்கிறதா பார்க்கலாம்!