மீண்டும் இசை அமைக்கிறார் பிரேம்ஜி

இசை அமைப்பாளர் மற்றும் இயக்குனருமான கங்கை அமரனின் மகன் பிரேம்ஜி. காமெடி நடிகராக புகழ் பெற்றிருந்தாலும், பார்ட்டி, சோனாவுடன் காதல் என்று அவ்வப்போது பரபரப்பும் கிளப்புகிறவர். துணிச்சல் என்ற படத்துக்கு முதன் முதலாக இசை அமைத்தார். அதன் பிறகு நெஞ்சத்தை கிள்ளாதே, தோழா, அதே நேரம் அதே இடம் என்ற படங்களுக்கு இசை அமைத்தார். இவர் இசை அமைத்த எந்த பாட்டும், படமும் ஹிட்டாகவில்லை. ஆனாலும் இவர் இசையை விடுவதாக இல்லை.

இப்போது வசந்த் அன்கோ அண்ணாச்சி மகன் விஜய் வசந்த் நடிக்கும் “என்னமோ நடக்குது” படத்திற்கு இசை அமைக்கிறார். விளம்பர இயக்குனர் ராஜாபாண்டி இயக்குகிறார். “என்னஜி மீண்டும் இசை அமைப்பாளராயிட்டீங்க” என்று கேட்டால். பாபா முத்திரை காட்டி பழித்து விட்டுச் சொல்கிறார் “எழுதி வச்சுக்குங்க 2013ல இதுதான் டாப் மியூசிக் படம். பாட்டை ஹிட்டாக்குற வரைக்கும் பார்ட்டிக்கு போறதில்லைன்னு முடிவு பண்ணிட்டேன். இந்த வாய்ப்பு எப்படி கிடைச்சுது தெரியுமா. விஜய் வசந்துக்கிட்போயி படத்துல எனக்கு வில்லன் வேஷம் கொடுன்னு கேட்டேன். உனக்கு வில்லன் வேஷம் கொடுத்தா கதைக்கு நீ வில்லனா இருக்க மாட்டே படத்துக்கே வில்லனாயிடுவே பேசாம மியூசிக் போடு”ன்னு சொல்லிட்டான். இதுதான் போட்டு வாங்குறது கத்துக்குங்க பாஸ். சக்சஸ் மீட்ல சந்திப்போம்” என்கிறார் உற்சாகமாக.