ராஜமௌலி இயக்கத்தில் வில்லனாகிறார் ராணா

‘மாவீரன்’, ‘நான் ஈ’ ஆகிய வெற்றிப்படங்களைத் தொடர்ந்து ராஜமௌலி தெலுங்கில் புதிய படம் ஒன்றை இயக்கவிருக்கிறார். சரித்திரப் பின்னணியை மையமாக வைத்து உருவாகும் இப்படத்தில் பிரபாஸ், அனுஷ்கா ஆகியோர் நடிக்கின்றனர். இப்படத்தில் வில்லனாக ராணா நடிக்க இருக்கிறார்.

ராஜமௌலி இயக்கும் படங்களில் வில்லனுக்கு அதிக முக்கியத்துவம் இருக்கும். இவர் இயக்கத்தில் சமீபத்தில் வெளியான ‘நான் ஈ’ படத்தில் வில்லன் கதாபாத்திரத்தில் நடித்திருந்த சுதீப், தமிழ் மற்றும் தெலுங்கு திரையுலகில் பரபரப்பாக பேசப்பட்டார்.

இந்நிலையில், ராணாவுக்கு ராஜமௌலி தன்னுடைய புதிய படத்தில் வில்லன் வேடம் கொடுத்திருப்பது அவருக்கு தெலுங்கு திரையுலகத்தில் ஒரு நிலையான இடத்தை கொடுக்கும் என நம்பப்படுகிறது.

இப்படத்திற்கான மற்ற நடிகர், நடிகைகள், தொழில்நுட்ப கலைஞர்கள் தேர்வு நடைபெற்று வருகிறது. விரைவில் படப்பிடிப்பு ஆரம்பமாக இருக்கிறது.