ஏப்ரலில் எதிர்நீச்சல் போடுமா சேட்டை?

கோடை விடுமுறையை குறி வைத்து படங்களை வெளியிடுவது வருடா வருடம் நடப்பதுதான். இந்த வருடம் இரண்டு படங்கள் தங்களின் கோடை வரவை அறிவித்துள்ளன.

யுடிவி தயாரித்திருக்கும் சேட்டை கோடை விடுமுறையை முன்னிட்டு ஏப்ரலில் வெளியாகிறது. இந்தி டெல்லி பெல்லியின் தமிழ் ரீமேக்கான சேட்டையில் ஆர்யா, சந்தானம், பிரேம்ஜி, ஹன்சிகா மோத்வானி, நாசர், அஞ்சலி ஆகியோர் நடித்துள்ளனர். கண்ணன் படத்தை இயக்கியுள்ளார்.

தனுஷின் முதல் தயாரிப்பான எதிர்நீச்சல் படமும் ஏப்ரலில் வெளியாவது உறுதி செய்யப்பட்டுள்ளது. சிவ கார்த்திகேயன், ப்ரியா ஆனந்த் நடித்துள்ள இந்தப் படத்துக்கு அனிருத் இசையமைத்துள்ளார். தனுஷ் சில பாடல்களை பாடியுள்ளார். கொல வெறி போலவே இந்தப் படத்தின் பாடல்கள் மிகப்பெரிய கவனிப்பை பெற்றதால் படத்தை வாங்க சன் பிக்சர்ஸ் உள்பட பல பெரிய நிறுவனங்கள் தயாராக உள்ளன.

இந்த இரு படங்களுடன் கேடி பில்லா கில்லாடி ரங்காவும் கோடை கொண்டாட்டத்தில் இணைந்து கொள்ளும் என தெரிகிறது.