டெல்லி மெட்ரோ ரெயில் நிலையத்தில் துப்பாக்கிச் சூடு: பெண் பலி

பகுஜன் சமாஜ் கட்சி பிரமுகர் தீபக் பரத்வாஜ் இன்று காலை அடையாளம் தெரியாத நபர்களால் டெல்லியில் சுட்டுக் கொல்லப்பட்டார்.

இந்த பரபரப்பு அடங்குவதற்குள் டெல்லி மெட்ரோ ரெயில் நிலையத்தில் இன்று நடந்த மற்றொரு துப்பாக்கிச் சூட்டில் ஒரு பெண் பலியாகியுள்ளார்.

கிழக்கு டெல்லியில் உள்ள கார்கர்டூமா மெட்ரோ ரெயில் நிலையத்தில் உள்ள மின்படிக்கட்டில் சென்றுக் கொண்டிருந்தவர்கள் மீது மர்மநபர் ஒருவர் துப்பாக்கியால் சுட்டார். இதில் குண்டு பாய்ந்து ஒரு பெண் பரிதாபமாக உயிர் இழந்தார்.

உடன் சென்ற அந்த பெண்ணின் தந்தை உடலில் குண்டு பாய்ந்தது. அவருக்கு ஆஸ்பத்திரியில் சிகிச்சை அளிக்கப்படுகிறது. விசாரணையில் இறந்த பெண்ணை அவரது கணவரே துப்பாக்கியால் சுட்டது தெரிய வந்துள்ளது. இது குறித்து விசாரணை நடந்து வருகிறது.

தலைநகர் டெல்லியில் தொடர்ந்து நடந்து வரும் துப்பாக்கிச் சூடு சம்பவங்கள் பொதுமக்களிடையே பீதியை ஏற்படுத்தியுள்ளது.