அமெரிக்க கோல்ப் போட்டியில் சாம்பியன்: மீண்டும் முதலிடத்தை பிடித்தார், டைகர் வுட்ஸ்

ஆர்லான்டோ, மார்ச்.27-

அர்னால்டு பார்மர் அழைப்பு கோல்ப் பந்தயம் அமெரிக்காவின் புளோரிடா மாகாணத்தில் உள்ள ஆர்லான்டோவில் நடந்தது. 4 சுற்று கொண்ட இந்த போட்டியில் அமெரிக்க ஜாம்பவான் டைகர் வுட்ஸ் 275 புள்ளிகளுடன் முதலிடத்தை பிடித்து சாம்பியன் பட்டத்தை தட்டிச் சென்றார்.
அவருக்கு ரூ.6 கோடி பரிசுத்தொகையாக கிடைத்தது.

இங்கிலாந்தின் ஜஸ்டின் ரோஸ் 277 புள்ளிகளுடன் 2-வது இடத்தையும், அமெரிக்காவின் மார்க் வில்சன் 280 புள்ளிகளுடன் 3-வது இடத்தையும் பெற்றனர். இந்த சீசனில் டைகர் வுட்சின் 3-வது பட்டம் இதுவாகும்.
பி.ஜி.ஏ டூரில் அவரது 77-வது பட்டமாகும்.

இந்த போட்டியில் மகுடம் சூடியதன் மூலம் 37 வயதான டைகர் வுட்ஸ், அயர்லாந்தின் ரோரி மெக்ல்ராயை பின்னுக்கு தள்ளிவிட்டு மீண்டும் முதலிட அரியணையில் ஏறியுள்ளார். 2010-ம் ஆண்டு அக்டோபர் மாதத்திற்கு பிறகு முதல் முறையாக முதலிடத்தை எட்டியுள்ள டைகர் வுட்ஸ் ஏற்கனவே 623 வாரங்கள் 'நம்பர்-ஒன்' ஆக இருந்திருப்பது குறிப்பிடத்தக்கது.