ஐ.பி.எல். 20 ஓவர் கிரிக்கெட் சென்னை போட்டிகளுக்கான டிக்கெட் விற்பனை நாளை தொடக்கம்

ஐ.பி.எல். 20 ஓவர் கிரிக்கெட் போட்டியில் சென்னையில் நடைபெறும் ஆட்டங்களுக்கான டிக்கெட் விற்பனை நாளை தொடங்குகிறது.

ஐ.பி.எல். கிரிக்கெட்

6–வது ஐ.பி.எல். 20 ஓவர் கிரிக்கெட் போட்டி அடுத்த மாதம் (ஏப்ரல்) 3–ந் தேதி முதல் மே 26–ந் தேதி வரை நடக்கிறது. 9 அணிகள் பங்கேற்கும் இந்த போட்டி 12 நகரங்களில் நடக்கிறது. சென்னை சூப்பர் கிங்ஸ் அணியின் 8 லீக் ஆட்டங்கள் சேப்பாக்கம் மைதானத்தில் நடக்கிறது.

ஐ.பி.எல். போட்டியில் 13 இலங்கை வீரர்கள் விளையாடுகிறார்கள். கிங்ஸ் லெவன் பஞ்சாப் அணியை தவிர மற்ற அணிகளில் இலங்கையை சேர்ந்த வீரர்கள் இடம் பிடித்துள்ளனர்.

இலங்கை பிரச்சினை

இலங்கை பிரச்சினை காரணமாக தமிழகத்தில் மாணவர்கள் தொடர் போராட்டத்தில் ஈடுபட்டு வருகிறார்கள். சென்னையில் நடைபெறும் போட்டியில் இலங்கை வீரர்களை விளையாட அனுமதிக்க மாட்டோம் என்று மாணவர்கள் அமைப்பினர் எச்சரிக்கை விடுத்து இருந்தனர். இதனால் ஐ.பி.எல். போட்டியில் இலங்கை வீரர்கள் பங்கேற்பார்களா? என்ற சந்தேகம் நிலவியது. அத்துடன் சென்னையில் நடைபெறும் போட்டிகளை மாற்ற வேண்டும் என்று வேண்டுகோள்கள் எழுந்தன.

ஆனால் சென்னையில் திட்டமிட்டபடி ஐ.பி.எல். போட்டி நடைபெறும் என்று இந்திய கிரிக்கெட் வாரியம் விளக்கம் அளித்து இருந்தது.

டிக்கெட் விற்பனை நாளை தொடக்கம்

இந்த நிலையில் சென்னையில் நடைபெறும் ஐ.பி.எல். ஆட்டங்களுக்கான டிக்கெட் விற்பனை நாளை (27–ந் தேதி) காலை 10 மணிக்கு சேப்பாக்கம் மைதானத்தில் உள்ள கவுண்ட்டர்களில் திட்டமிட்டபடி நடைபெறுகிறது. இதனை இந்திய கிரிக்கெட் வாரியம் மற்றும் தமிழ்நாடு கிரிக்கெட் சங்க மீடியா மானேஜர் டாக்டர் பாபா உறுதி செய்தார்.

ரூ.750 முதல் ரூ.15 ஆயிரம் வரையில் டிக்கெட்டுகள் விற்பனை செய்யப்படுகின்றன. சென்னையில் ஏப்ரல் 6–ந் தேதி நடைபெறும் முதல் லீக் ஆட்டத்தில் சென்னை சூப்பர் கிங்ஸ்–மும்பை இந்தியன்ஸ் அணிகள் மோதுகின்றன.