விமானம் மூலம் சிரியாவுக்கு போர் ஆயுதங்கள் செல்வதை தடுக்க வேண்டும் ஈராக் பிரதமரிடம் அமெரிக்க மந்திரி வற்புறுத்தல்

சிரியாவில் கடந்த 2 ஆண்டாக நீடிக்கும் கிளர்ச்சியை முறியடிக்க அதிபர் ஆசாத் தீவிர முயற்சியில் ஈடுபட்டு வருகிறார். இவருக்கு நட்பு நாடான ஈரான் உதவிக்கரம் நீட்டி வருகிறது. ஈரானில் இருந்து விமானம் மூலம் போர் ஆயுதங்களை ரகசியமாக சிரியாவிற்கு அனுப்பப்படுகிறது. இந்த விமானங்கள் ஈராக் வான்வெளி வழியாக பறந்து செல்வதை அமெரிக்கா கண்டுபிடித்துள்ளது. எனவே இதை எச்சரிக்கையுடன் கண்காணிக்க ஈராக்குக்கு கோரிக்கை விடுத்திருந்தது.

இந்நிலையில் அமெரிக்க மந்திரி ஜான் கெர்ரி திடீரென்று பாக்தாத் சென்று ஈராக் பிரதமர் நூரி அல்–மாலிகியுடன் அவசர ஆலோசனை நடத்தினார். அப்போது அவர் ஈராக் வழியாக சிரியாவுக்கு ஆயுதம் கடத்துவதை தடுக்க வேண்டும் என வலியுறுத்தினார்.