சென்னை வந்த தமன்னா புயல்

தமிழில் கல்லூரி படம் மூலம் அறிமுகமாகி, சிறுத்தை, பையா என பல படங்களில் நடித்து தமிழ் ரசிகர்களின் தூக்கத்தைக் கெடுத்த நடிகை தமன்னா, திடீரென தமிழுக்கு டாடா காட்டிவிட்டு தெலுங்கு பக்கம் போய்விட்டார்.

தமிழ் நடிகர் ஒருவருடன் ஏற்பட்ட காதலும், அதனைத் தொடர்ந்து ஏற்பட்ட முறிவும்தான் அவர் தமிழை தவிர்ப்பதற்குக் காரணம் என்று கூறப்பட்டது. எல்லாவற்றையும் தாண்டி தற்போது தமிழில் மீண்டும் ஒரு படத்தில் நடிக்க ஒப்பந்தம் ஆகியுள்ளார் தமன்னா.

இயக்குநர் கதிரிடம் உதவி இயக்குநராக பணியாற்றிய கருணாகரன் இயக்கத்தில் உருவாகும் "ஏனென்றால் காதல் என்பேன்" படம் ஒரே நேரத்தில் தமிழ் மற்றும் தெலுங்கு ஆகிய இரண்டு மொழிகளிலும் உருவாகிறது. இப்படத்தில் புதுமுகம் ராம் - தமன்னா ஜோடியாக நடிக்கின்றனர்.

படத்தின் அறிமுக விழா சென்னையில் நடந்தது. விழாவில் கலந்து கொள்ள வந்த தமன்னாவிற்கு சென்னை விமான நிலையத்தில் தமிழ் ரசிகர்கள் உற்சாக வரவேற்பு அளித்தனர்.