இரண்டாவது படத்தை இயக்கும் பணியில் நந்தினி தீவிரம்

கோலிவுட்டில் தற்போது பெண் இயக்குநர்களின் எண்ணிக்கை அதிகரித்துக் கொண்டே வருகிறது. அதில் சீனியராக இருப்பவர் நந்தினி.

சில ஆண்டுகளுக்கு முன்பு, சத்யம் சினிமாஸின் தயாரிப்பில் திரு திரு திரு திரு படத்தை இயக்கியவர்தான் நந்தினி. இந்த படத்தில் நடித்த அஜ்மல் மற்றும் ரூபா மஞ்சரிக்கு நல்ல பெயர் கிடைத்தது. படமும் நகைச்சுவை மற்றும் காதல் நிறைந்து இருந்தது.

ஒரு நீண்ட இடைவெளிக்குப் பிறகு நந்தினி தனது இரண்டாவது படத்தை இயக்க வந்துள்ளார். முதல் படம் காமெடியாக அமைந்திருந்தது. இரண்டாவது படம் துப்பறியும் த்ரில்லர் படமாக உருவாக்க திட்டமிட்டுள்ளார். படத்தை லிப்ரா புரொடக்ஷன் நிறுவனம் தயாரிக்கிறது.

லிப்ரா புரொடக்ஷன் தயாரிப்பு நிறுவனத்தின் உரிமையாளர் ரவிந்தர் சந்திரசேகரன் ஏற்கனவே இரண்டு படங்களை தயாரித்துள்ளார். நளனும் நந்தினியும், சுட்ட கதை ஆகிய படங்கள் இவரது தயாரிப்பில் வெளியான படங்கள்தான். சுவிட்சர்லாந்தில் பிசினஸ் செய்து வரும் ரவிந்தர், தமிழில் சிறந்த திரைப்படங்களை தயாரிக்க விரும்புகிறார். எனவே, சிறந்த இயக்குநர்களை வலை வீசி தேடியதில் கிடைத்தவர்தான் நந்தினி.