ஏப்ரலில் தொடங்குகிறது ‘பீட்சா 2 – தி வில்லா’ படப்பிடிப்பு

கடந்த ஆண்டு வெளியான குறும் பட்ஜெட் திரைப்படமான பீட்சா யாரும் எதிர்பார்க்காத அளவில் மிகப் பெரிய வெற்றி பெற்றது.

கார்த்திக் சுப்புராஜ் இயக்கிய இந்தப் படத்தில் விஜய் சேதுபதி நாயகனாகவும் ரம்யா நம்பீசன் நாயகியாகவும் நடித்திருந்தனர். சந்தோஷ் நாராயணன் இசையமைத்து இருந்தார். பீட்சா திரைப்படத்தின் வெற்றி அதன் தயாரிப்பாளரை இரண்டாம் பாகத்தை எடுக்க தூண்டியுள்ளது. இதன் இரண்டாம் பாகம் ‘பீட்சா 2 – தி வில்லா’ என்ற பெயரில் தயாராக இருக்கிறது.

ஆனால் இந்த முறை இசையமைப்பாளர் சந்தோஷ் நாராயணனை தவிர மொத்தமாக படக்குழுவே மாறியிருக்கிறது. சரோஜா, மங்காத்தா படங்களில் நடித்த வைபவ் நாயகனாகவும், தில்லாலங்கடி, கொள்ளைக்காரன் படங்களில் நடித்த சஞ்சிதா ஷெட்டி நாயகியாகவும் நடிக்கின்றனர். இந்த படத்தை இயக்கவும் ஒரு புதுமுக இயக்குனருக்கு வாய்ப்பளித்துள்ளார் தயாரிப்பாளர் சி.வி. குமரன். குறும் பட இயக்குனர் தீபன் சக்கரவர்த்தி என்பவரை இந்த படத்தின் மூலம் இயக்குனராக அறிமுகப்படுத்துகிறார். படப்பிடிப்பு ஏப்ரல் மாதம் தொடங்கி தொடர்ந்து நடைபெற இருக்கிறது.