விஜய் நடிக்கும் ‘ஜில்லா’ படத்திற்கு இன்று பூஜை

விஜய் நடிக்கும் 'ஜில்லா' திரைப்படத்தின் பூஜை இன்று நடைபெற்றது.

நேசன் இயக்குனராக அறிமுகமாகும் திரைப்படம் ஜில்லா. விஜய் நடிக்கும் இந்தப் படத்தில் அவருக்கு ஜோடியாக காஜல் அகர்வால் நடிக்கிறார்.

இந்நிலையில் 'ஜில்லா' பட பூஜை இன்று காலை சென்னை தியாகராயநகரில் உள்ள ஆர்.பி. சௌத்ரியின் சூப்பர் குட் பிலிம்ஸ் அலுவலகத்தில் நடந்தது. இதில் விஜய், தயாரிப்பாளர் ஆர்.பி. சௌத்ரி, நடிகர்கள் ஜீவா, ‘ஜித்தன்’ ரமேஷ், இசையமைப்பாளர் இமான், படத்தின் இயக்குனர் ஆர்.டி. நேசன் உள்பட திரையுலகப் பிரமுகர்கள் பலர் கலந்து கொண்டு வாழ்த்தினர்.

நிகழ்ச்சிக்குப் பின்னர் செய்தியாளர்களிடம் விஜய் பேசியதாவது: ‘ஜில்லா’ படத்தில் மோகன்லாலுடன் இணைந்து நடிப்பது மகிழ்ச்சி அளிக்கிறது. ஏற்கனவே ஆர்.பி.சௌத்ரி தயாரித்த ‘பூவே உனக்காக’, ‘துள்ளாத மனமும் துள்ளும்’, ‘லவ்டுடே’, ‘திருப்பாச்சி’ ஆகிய படங்களில் நடித்துள்ளேன். எங்கள் கூட்டணியில் உருவான அனைத்துப் படங்களும் வெற்றிப் பெற்றன. அந்த படங்களின் சாதனையை ‘ஜில்லா’ படம் முறியடிக்கும். இதில் காஜல் அகர்வால் நாயகியாக நடிக்கிறார் என்றார்.

இதனிடையே 'ஜில்லா' படத்தின் படப்பிடிப்பு மே 2ம் தேதி தொடங்கி தொடர்ந்து நடைபெற இருக்கிறது.