அமீருக்கும் எனக்குமான நட்பு என்றும் மாறாதது: சேரன்

ஆயிரம் முத்தங்களுடன் தேன்மொழி' என்ற படத்தின் பாடல் வெளியீட்டு விழா சென்னை பிரசாத் லேப் தியேட்டரில் நடைபெற்றது. இதில் சிறப்பு விருந்தினர்களாக டைரக்டர் சேரன், அமீர், சினேகா ஆகியோர் பங்கேற்றனர். மேலும் படத்தின் தயாரிப்பாளர் மைக்கேல் ராயப்பன், இயக்குநர் சண்முகராஜ், நாயகன் வெங்கடேஷ்- நாயகி அக்ஷரா ஆகியோரும் வந்திருந்தனர். பி.ஆர்.ஓ நிகில் விழாவுக்கான ஏற்பாடுகளை செய்திருந்தார். இவ்விழாவில் சமீபகாலமாக பெப்சி தொழிலாளர் சம்பள விவகாரத்தில் எதிரும் புதிருமாக கருத்து கூறி வரும் இயக்குநர்களான சேரனும், அமீரும் வந்திருந்ததால் அவர்கள் ஏதாவது அதுபற்றி மேடையில் பேசுவார்கள் என்று எதிர்பார்க்கப்பட்டது. அதாவது சேரன், 100 கோடி படம் தயாரிப்பவரும், ஒரு கோடியில் படம் தயாரிப்பவரும் எப்படி ஒரேமாதிரியான சம்பளத்தை தர முடியும் என்று தனது கருத்தினை கூறி வந்தார். அமீரோ, யாராக இருந்தாலும் சங்கம் சொல்லும் நபர்களை வைத்து ஒரே சம்பளத்தை கொடுக்க வேண்டும் என்று முரண்பட்ட கருத்தினை கூறி வந்தார். அதனால் அவர்கள் இதுபற்றி பேசக்கூடும் என்ற எதிர்பார்க்கப்பட்ட நிலையில் சேரன் பேசுகையில், சமீபகாலமாக என்னையும், அமீரையும் இருதுருவங்கள் என்று கூறி வருகிறார்கள். இதற்கு காரணம் எங்களுக்குள் நிலவும் சம்பள பிரச்சினை சம்பந்தப்பட்ட கருத்துதான். ஆனால் நாங்கள் இருவரும் இப்போதும் நண்பர்களே. கருத்துக்கள் வெவ்வேறாக இருந்தாலும் நட்பு என்றும் மாறாதது. அவர் ஒரு திசை, நான் ஒரு திசை என்று பயணித்தாலும் சேரும் இடம் ஒன்றாகத்தான் இருக்கும் என்று பேசி, பிரச்சினைக்கு முற்றுப்புள்ளி வைத்தார் சேரன். வடக்கும் தெற்கும் சேர்ந்திடுச்சுனு கிறுக்கு பையன் காதில பூ சுத்துறாரு.....