'கும்கி' நாயகியை புகழ்ந்து தள்ளும் பிரபு சாலமன்

தமிழ் சினிமாவிற்கு இன்னொரு ஷோபாவாக கிடைத்திருக்கிறார் நடிகை லட்சுமி மேனன் என்று டைரக்டர் பிரபு சாலமன் கூறியிருக்கிறார். 'லீ', 'லாடம்', 'கொக்கி' என்று வித்தியாசமான கதைகளை கொடுத்து வந்த டைரக்டர் பிரபு சாலமன், அடுத்து 'மைனா' படம் மூலமாக ஒரு ஆழமான காதலையும், அதன்மூலம் மக்களை அழுகவும் வைத்தார். 'மைனா' படத்தில் நடித்த ஹீரோ-ஹீரோயின்கள் இப்போது டாப் ரேஞ்சுக்கு போய்விட்ட நிலையில் இப்போது வித்தியாசமான கதை களத்துடன் 'கும்கி' என்ற படத்தை இயக்கி வருகிறார். இப்படத்தின் நாயகனாக நடிகர் பிரபுவின் மகன் விக்ரமும், நாயகியாக லட்சுமி மேனனும் நடிக்கின்றனர். படத்தின் ஷூட்டிங் இன்னும் 10-15நாளில் முடிவடையும் நிலையில் உள்ளது. இந்நிலையில் படம் குறித்தும், அதில் நடித்த ஹீரோ-ஹீரோயின்கள் பற்றியும் பிரபு சாலமனிடம் கேட்டபோது அவர் கூறியதாவது, படம் நன்றாக வந்திருக்கிறது. படத்தின் ஹீரோயினாக கேரள வரவு லட்சுமி மேனன் நடித்து வருகிறார். நடிப்பில் சும்மா வெளுத்து வாங்குகிறார். லட்சுமி மேனனை தமிழ் சினிமாவிற்கு கிடைத்த இன்னொரு நடிகை ஷோபா என்று தான் சொல்லணும் என்றார். அடுத்து கதையின் நாயகனும், நடிகர் பிரபுவின் மகனுமான விக்ரம் பற்றி பேசுகையில், நடிப்பு என்பது இவர் ரத்தத்திலேயே ஊறி போய் இருக்கிறது. ஒரு காட்சியை விளக்கி கூறும் போது, அதை ரொம்ப எளிமையாக எடுத்து கொண்டு, ரொம்ப சூப்பரா நடித்து கொடுத்து விடுகிறார். இவரது தாத்தா, அப்பாவை போலவே விக்ரமும் பெரிய நடிகராக வருவார் என்றவர், படத்தில் நடித்த மாணிக்கம் என்ற யானை பற்றியும் சொன்னார். மனிதர்களை வைத்து படம் இயக்கி விடலாம், ஆனால் மிருகங்களை வைத்து படம் எடுப்பது ரொம்பவே சவாலான விஷயம். காமிரா ஓடிக்கிட்டே இருக்கும், நாம நினைச்ச மாதிரி காட்சிகள் வரும் வரை, காத்திருந்து தான் படம் எடுக்க வேண்டியிருக்கும். இப்படி 'கும்கி' படத்தில் பல சவாலான விஷயங்கள் இருந்துச்சு என்று சொன்ன பிரபு சாலமன், படத்தை மே மாதம் ரிலீஸ் செய்வதற்கான முயற்சியிலும் இறங்கியிருக்கிறார். சவால சாதனையா மாத்தும் ஜாலம் தெரியாதவரா நீங்க...?