அமீருக்கு பதில் மனோஜா...? பாரதிராஜா புதுத்திட்டம்!

அமீரை இயக்குநர் சங்கச்செயலாளர் பதவியில் இருந்தோ, அல்லது ஃபெப்ஸி ஊதியக்குழு தலைவர் பதவியில் இருந்தோ தூக்க முடியாது என்பதை தெரிந்து கொண்ட பாரதிராஜா, ஒருவழியாக தனது 'அன்னக்கொடியும் கொடிவீரனும்' படத்தில் இருந்து அமீரை தூக்கி விட்டார். இதை பாரதிராஜாவே அதிகாரப்பூர்வமாக அறிவித்து அமீர் மீதான தனது கடுப்பைக் காட்டியிருப்பதுதான் கோடம்பாகத்தின் இன்றைய அனல் பறக்கும் செய்தி. திரைக்கதையில் ஏற்பட்ட திடீர் மாற்றங்கள் காரணமாக, "அன்னக்கொடியும் கொடிவீரனும் படத்தில் அமீர் இல்லை. எதிர்காலத்தில் அவனை வைத்து வேறு படம் இயக்கும் வாய்ப்புகள் இல்லாமல் இல்லை" என்று கூறியிருக்கும் பாரதிராஜா, தற்போது பார்த்திபன் போய் அமீர் வந்த கதாபாத்திரத்தில் ஆர்.கே.செல்வமணியை நடிக்க வரும்படி அழைத்திருக்கிறார் என்கிறார்கள். செல்வமணியோ 'சும்மா கிச்சு கிச்சு பண்ணாதீங்க சார்' என்று சொல்லியும் இயக்குநர் இமயம் கேட்கிற மாதிரி இல்லை என்கிறார்கள். திரைக்கதை மாறிவிட்டது என்று பாரதிராஜா சொன்னாலும் உண்மையான காரணம் என்ன என்பது தமிழ்நாட்டையும் தாண்டி அம்பலமாகிப் போன விஷயம்தான். ஒரு இயக்குநர் என்பதைக் காட்டியிலும், வரவு செலவுக்கணக்கில் உஷாராக இருக்கும் ஒரு தயாரிப்பாளராகவே தன்னை தக்க வைத்துக் கொண்டிருக்கும் பாரதிராஜா, அமீர் பெப்ஸி தொழிலாளர்கள் பக்கம் சாய்ந்ததில் இருந்தே கோபத்தின் உச்சத்துக்குப் போனார். அதற்கும் முன்பு, தனக்கு மட்டுமே இயக்குநர் சங்க நாற்காலி என்று இருந்த பாரதிராஜாவுக்கு எதிராக தலைவர் பதவிக்கு போட்டியிட்ட அமீர் மீதான கோபத்தை, தனது தலைவர் பதவியை ராஜினாமா செய்ததன் மூலம் காட்டினார். தற்போது அமீர் மீதிருக்கும் கோபத்தில் ஃபெப்சி தொழிலாளர்களுக்கு எதிராக 'தமிழ்சினிமா தொழிலாளர்கள் அமைப்பை' ஏற்படுத்த துடிக்கிறார். இந்த விவகாரம், ஒரு இமயம் அடிவாரம் ஆன கதையாக நீர்த்துப்போய்க் கொண்டிருக்கிறது என்கிறார்கள் தமிழ்திரையின் நோக்கர்கள். தற்போது கிடைத்த தகவலின்படி, செல்வமணி செவி சாய்க்காததால், அமீருக்கு பதில் தனது மகன் மனோஜ் பாரதியையே இந்த கேரக்டரில் நடிக்கவைக்கப் போகிறாராம் பாரதிராஜா. இயக்குநர் இமயத்தின் இமேஜை தூக்கி நிறுத்த மகனை நாடியுள்ளார் பாரதிராஜா. 'காதல் தீவு' படத்தில் வில்லன் வேடன் ஏற்றிருக்கும் மனோஜ் பாரதிக்கு இந்த படம் நல்ல வரப்பிரசாதமாக அமையும். அப்பாவும் புள்ளயும் தங்களை நிரூபிக்கும் தருணத்தில் இருப்பதால் இருவருக்குமே எதிர்பார்ப்புகளை பூர்த்தி செய்யவேண்டிய நிர்ப்பந்தம் ஏற்பட்டிருக்கு. நிறைவேற்றுவாரா தெக்கத்திக்காரர்?!