விஸ்வரூபம்-2 படமான காட்சிகள் தணிக்கை குழுவுக்கு அனுப்பப்படுகிறது

கமலின் விஸ்வரூபம் சர்ச்சைகளில் சிக்கி தாமதமாக ரிலீசாகி ஓடிக்கொண்டிருக்கிறது. இப்படத்தில் இஸ்லாமிய அமைப்புகள் ஆட்சேபித்த சீன்கள் நீக்கப்பட்டன. வசனங்களும் அகற்றப்பட்டது.

இந்த நிலையில் விஸ்வரூபம் படத்தின் 2-ம் பாகமும் அதிரடியாக தயாராகியுள்ளது. இதன் முதல் பாகம் படத்தை எடுத்தபோதே 2-ம் பாகத்திற்கான காட்சிகளையும் கமல் படமாக்கிவிட்டார். 2-ம் பகுதி இந்தியாவில் நடப்பது போன்று திரைக்கதை உருவாக்கப்பட்டு உள்ளது.

இங்கு தீவிரவாதிகள் தாக்குதல் நடத்த ஆப்கானிஸ்தானிலும், அமெரிக்காவிலும் திட்டம் வகுப்பது போன்ற சீன்கள் எடுக்கப்பட்டு விட்டன. ஏற்கனவே விஸ்வரூபம் பட கிளைமாக்சை தீவிரவாத தலைவன் அமெரிக்காவில் இருந்து விமானத்தில் தப்புவதுபோல் கமல் முடித்து இருந்தார்.

அவன் இந்தியாவில் நாசவேலைகளில் ஈடுபட வகுக்கும் திட்டங்கள் 2-ம் பாகத்தில் இடம்பெறுகிறது. கமல், பூஜாகுமார், ஆண்ட்ரியா நடித்துள்ளனர். இன்னும் 15 நாள் படப்பிடிப்பு பாக்கி உள்ளதாகவும் அது முடிந்ததும் தணிக்கை குழுவுக்கு படம் அனுப்பப்படும் என்றும் விஸ்வரூபம் வட்டாரத்தில் தெரிவிக்கப்பட்டது.

ஏற்கனவே படமாக்கப்பட்ட காட்சிகளுக்கு டப்பிங் மற்றும் ரீரிக்கார்டிங் பணிகள் நடந்து வருகின்றன.

இந்த படத்துக்கு எதிர்ப்புகள் கிளம்பாத வகையில் காட்சிகள் மாற்றி அமைக்கப்பட்டு உள்ளதாக கூறப்படுகிறது. வசனங்களும் மாற்றப்பட்டு உள்ளன. ஓரிரு மாதத்தில் படம் ரிலீசாகும் என எதிர்பார்க்கப்படுகிறது.