நான் கடலில் விழுந்து மூழ்கியதாக வதந்தி: தனுஷ்

மரியான்’ படத்தில் தனுஷ் நடிக்கிறார். பரத்பாலா இயக்குகிறார். இதில் நாயகியாக பார்வதியும் இன்னொரு முக்கிய கேரக்டரில் அப்புக்குட்டியும் நடிக்கின்றனர்.

இதன் படப்பிடிப்பு கன்னியாகுமரி மாவட்டத்தில் உள்ள குளச்சல் கடலோர பகுதியில் நடந்து வருகிறது. மீனவர்கள் வாழ்க்கையை மையமாக வைத்து இப்படம் தயாராகிறது. தனுசும் அப்புக்குட்டியும் படகில் பத்து கிலோ மீட்டர் தூரம் கடலுக்குள் சென்று மீன் பிடிப்பது போன்ற காட்சியை இயக்குனர் படமாக்கியதாகவும் அப்போது திடீரென பெரிய அலை வந்து படகை தலை கீழாக கவிழ்த்து போட்டதாகவும் தனுசும் அப்புக்குட்டியும் கடலில் மூழ்கி தத்தளித்ததாகவும் செய்திகள் வெளியாயின.

படப்பிடிப்பு குழுவினரும் மீனவர்களும் கடலில் குதித்து தனுசையும் அப்புக்குட்டியையும் காப்பாற்றி கரைக்கு கொண்டு வந்ததாகவும் கூறப்பட்டது. தனுசிடம் இது குறித்து கேட்டபோது மறுத்தார்.

அவர் கூறியதாவது:- படப்பிடிப்பில் படகு விபத்து நடக்கவே இல்லை. நாங்கள் படப்பிடிப்புக்காக கடலுக்குள் போனோம். ஆனால் கடல் எங்களை பத்திரமாக பார்த்துக் கொண்டது. நானும் அப்புக்குட்டியும் கடலில் விழுந்து மூழ்கியதாக வெளியான செய்தி வெறும் வதந்திதான். அப்படி எதுவும் நடக்கவில்லை.

இவ்வாறு தனுஷ் கூறினார்.