லட்சுமிராயை நான் காதலிக்கவில்லை: வினய்

லட்சுமிராய்-வினய் இடையே காதல் மலர்ந்துள்ளதாக கிசுகிசு பரவி உள்ளது. இருவரும் பி.டி.செல்வகுமார் இயக்கும் 'ஒன்பதுல குரு' படத்தில் இணைந்து நடிக்கின்றனர்.

படப்பிடிப்பில் இருவருக்கும் நெருக்கம் ஏற்பட்டு காதலாக மலர்ந்ததாக செய்தி பரவியுள்ளது. சமீபத்தில் இதன் படப்பிடிப்பு புதுச்சேரியில் நடந்தபோது இருவருக்கும் தனித்தனி ஓட்டல்களில் ரூம் ஒதுக்கப்பட்டு இருந்தன. அப்போது வினய் தனக்கும் லட்சுமிராய் தங்கும் ஓட்டலிலேயே அறை ஒதுக்க வேண்டும் என்று அடம் பிடித்ததாகவும் கூறப்பட்டது.

இதுகுறித்து சென்னையில் நேற்று நிருபர்களை சந்தித்த வினய்யிடம் கேள்வி எழுப்பப்பட்டது. அதற்கு பதில் அளித்து வினய் கூறியதாவது:-

லட்சுமிராயும் நானும் 'ஒன்பதுல குரு' படத்தில் இணைந்து நடிப்பதால் எங்களுக்குள் நெருக்கம் ஏற்பட்டுள்ளது என்றும் காதல் என்றும் கிசுகிசுக்கள் பரப்பப்பட்டு உள்ளன. லட்சுமிராய் திறமையான நடிகை. ஒவ்வொரு காட்சியிலும் அர்ப்பணிப்பு உணர்வோடு நடித்ததை பார்த்தேன். எனக்கும் லட்சுமிராய்க்கும் இடையே நல்ல புரிதல் இருந்தது. இதனால் சிறப்பாக நடித்தோம். வேறு மாதிரியான தொடர்பு எங்களுக்குள் இல்லை.

லட்சுமிராயுடன் ஒரே ஓட்டலில் தங்க வேண்டும் என்று நான் அடம்பிடிக்கவும் இல்லை. 'ஒன்பதுல குரு' படத்தில் நான் காமெடி செய்துள்ளேன். என் திரையுலக வாழ்க்கையில் முக்கிய படமாக இருக்கும். பி.டி. செல்வகுமார் பிரமாதமாக படத்தை எடுத்துள்ளார். கே. இசையில் பாடல்கள் சிறப்பாக வந்துள்ளன. 'வா மச்சி' பாடல் இளைஞர்களை கவரும். அரவிந்த், ஆகாஷ், பிரேம்ஜி, சத்யன், சாம்ஸ் போன்றோரும் என்னுடன் நடித்துள்ளனர்.

இவ்வாறு வினய் கூறினார்.