விடுதி ஒன்றில் வெளிநாட்டுப்பெண்ணை நிர்வாணமாக பார்த்த இளைஞன் கைது!

நீர்கொழும்பு சுற்றுலா விடுதியொன்றின் அறைக்குள் ஒளிந்திருந்து, வெளிநாட்டு பெண் ஒருவரை நிர்வாணமாகப் பார்த்ததாகக் குற்றஞ்சுமத்தப்பட்ட இளைஞனை எதிர்வரும் 31ஆம் திகதி வரை விளக்கமறியலில் வைக்குமாறு நீர்கொழும்பு பிரதான நீதவான் ஏ.எம்.என்.பி. அமரசிங்க உத்தரவிட்டுள்ளார்.

25 வயதான இந்த இளைஞன் யாருக்கும் தெரியாமல் நீர்கொழும்பு, லுவிஸ் பிரதேசத்திலுள்ள ”கெடமரஸின்” என்ற விடுதிக்குள் புகுந்து அங்கு அறையொன்றில் ஒளிந்திருந்த போது விடுதி ஊழியர்களினால் பிடிக்கப்பட்டு தம்மிடம் ஒப்படைக்கப்பட்டதாக நீர்கொழும்பு காவல்துறையினர் தெரிவித்தனர்.

விடுதிக்கு பின்புறமாக உள்ள கடற்கரை வழியாக வந்து விடுதிக்குள் நுழைந்து, யாருக்கும் தெரியாமல் அறைக்குள் ஒளிந்துகொண்டதாக விசாரணைகளிலிருந்து தெரியவந்துள்ளது.

சந்தேக நபர் இதற்கு முன்னரும் வீடொன்றுக்குள் இவ்வாறு ஒளிந்திருந்த நிலையில் பிடிக்கப்பட்டு, நீதிமன்றத்தினால் பிணையில் விடுவிக்கப்பட்டவர் எனத் தெரியவருகிறது.