கடவுள் அருளால் 5 படங்களில் நடிக்கிறேன்-நயன்தாரா

தமிழ், தெலுங்கு படங்களில் மீண்டும் பிசியாகியுள்ளார் நயன்தாரா.

ஸ்ரீராம ராஜ்ஜியம் தெலுங்கு படம் முடிந்ததும் கண்ணீரோடு விடைபெற்று சினிமாவுக்கு முழுக்கு போடுவதாக உறுதி செய்தார். புதுப்படங்களுக்கு ஒப்பந்தம் ஆகவில்லை. மதம் மாறி காதல் கணவரை திருமணம் செய்து கொள்ளவும் தயாரானார். ஆனால் அது நிறைவேறவில்லை.

காதல் முறிந்தது. திருமணமும் ரத்தானது. இதனால் மீண்டும் நடிக்க வந்தார். பழைய வரவேற்பு அப்படியே கிடைத்தது. பெரிய ஹீரோக்கள் போட்டி போட்டு ஜோடி சேர்த்தனர். சம்பளமும் உயர்ந்தது.

தற்போது அஜீத் ஜோடியாக “வலை”, ஆர்யா ஜோடியாக “ராஜாராணி”, உதயநிதியுடன் “கதிர்வேலன் காதலி” படங்களில் நடிக்கிறார். தெலுங்கிலும் இரண்டு படங்களில் நடித்து வருகிறார். தமிழ், தெலுங்கில் ரீமேக் ஆகும் “கஹானி” இந்திப் படத்தில் நடிக்கவும் ஒப்பந்தமாகியுள்ளார்.

இதுகுறித்து நயன்தாரா கூறியதாவது:-

நான் நடித்த 5 படங்கள் இந்த ஆண்டு ரிலீசாக உள்ளது. இதற்கெல்லாம் கடவுள் அருள்தான் காரணம். நான் கடுமையாக உழைக்கிறேன். பலனை கடவுளிடம் விட்டு விடுகிறேன்.

படங்கள் வெற்றி பெறுவதற்கு யாரும் உத்தர வாதம் அளிக்க முடியாது. ஒவ்வொரு படமும் வெவ்வேறு விதமாக வருகின்றன. இந்த படம்தான் வெற்றி பெறும் என்று உறுதியாக கணிக்க முடியாது.

தமிழில் ராஜாராணி, கதிர் வேலன் காதலி, அஜீத்தின் படத்திலும் மற்றும் ரீமேக் படம் ஆகியவற்றில் நடிக்கிறேன்.

இவ்வாறு அவர் கூறினார்.