பாடல் வாய்ப்பு கேட்டேன் நடிப்பு சான்ஸ் கிடைத்தது

சென்னை : பாடல் எழுத வாய்ப்புக் கேட்டபோது நடிக்க வாய்ப்பு கிடைத்தது என்று ஜோ மல்லூரி கூறினார். சமீபத்தில் வெளியாகி ஹிட்டான படம், ‘கும்கி’. பிரபு சாலமன் இயக்கியுள்ள இந்தப் படத்தில் ஊர்த்தலைவராக நடித்துள்ள ஜோ மல்லூரியின் நடிப்பு பேசப்பட்டது. இதில் நடித்தது பற்றி அவர் கூறியதாவது:

சினிமாவுக்கு பின்னால் வேலை பார்த்துக் கொண்டிருந்தேன். பிரபு சாலமனிடம் பாடல் எழுத வாய்ப்புக் கேட்டுப் போனேன். ஏற்கனவே, ‘பொம்மலாட்டம்’ படத்தில் பாடல் எழுதியுள்ளேன். ‘நடிப்பு பயிற்சி பெற்றிருக்கிறீர்களே, நடிக்கலாமே?’ என்று பிரபு சாலமன் கேட்டார். சரி என்றேன். அப்படி வந்ததுதான், ஊர்த்தலைவர் கேரக்டர். ‘கும்கி’ படத்தை பார்த்துவிட்டு பல பேர் பாராட்டினார்கள். ரஜினிகாந்தின் பாராட்டு மறக்க முடியாதது. இந்தப் படத்துக்கு பிறகு நிறைய வாய்ப்புகள் வந்துள்ளன.

கதைகளை தேர்ந்தெடுத்தே நடிக்கிறேன். சிறந்த குணசித்திர நடிகராக ஆக வேண்டும் என்று விரும்புகிறேன். இப்போது, கரு. பழனியப்பன் இயக்கும் ‘ஜன்னல் ஓரம்‘ படத்தில் நடித்துக்கொண்டிருக்கிறேன். உதயநிதி ஸ்டாலின் நடிக்கும் அடுத்த படத்தில் நடிக்க அழைத்திருக்கிறார்கள். தெலுங்கில் ராம்கோபால் வர்மா உதவியாளர் இயக்கும் படத்தில் நடிக்கவும் வாய்ப்பு வந்திருக்கிறது. இவ்வாறு ஜோ மல்லூரி கூறினார்.