2012-ல் வெளிவர இயலாத படங்களால் ரூ.200 கோடி முடக்கம்

சென்னை: 2012-ல் தணிக்கை செய்யப்பட்டு வெளிவராத படங்களால் சுமார் 200 கோடி ரூபாய் முடங்கியதாகக் கூறப்படுகிறது. பொதுவாக தணிக்கை செய்யப்பட்டு ஒரு வாரத்துக்குள் படத்தை வெளியிடுவது வழக்கம். ஆனால் கடந்த ஆண்டு தணிக்கை செய்யப்பட்ட சுமார் 90 படங்கள் வெளிவர முடியாமல் போனது. தணிக்கை செய்யப்பட்டு இதுவரை வெளிவராத படங்கள் ஆயிரத்தை தொடும் என்றாலும் கடந்த ஆண்டு தணிக்கை செய்யப்பட்ட சுமார் நூறு படங்கள் வெளிவராதது சாதனை அளவாக கருதப்படுகிறது. வனயுத்தம், வெட்கத்தை கேட்டால் என்ன தருவாய், சமர், பேச்சியக்கா மருமகன், பத்தாயிரம் கோடி உட்பட சுமார் 75 படங்கள் கடந்த ஆண்டு வெளியிட திட்டமிடப்பட்டும் வெளியாகவில்லை. இதனால் சராசரியாக ஒரு படத்துக்கு இரண்டு முதல் மூன்று கோடி ரூபாய் பட்ஜெட் என்று வைத்துக் கொண்டாலும் சுமார் 200 கோடி ரூபாய் முடங்கிக் கிடக்கிறது. இந்த படங்கள் இந்த ஆண்டு வெளிவரும் என்று எதிர்பார்க்கப்படுகிறது.