டான்ஸ் கற்றுக்கொடுக்க வருகிறது ஏபிசிடி டீம்

சென்னை: பிரபுதேவா நடித்துள்ள இந்தி படம், ‘எனிபடி கேன் டான்ஸ்’ (ஏபிசிடி). இது தமிழிலும் டப் ஆகிறது. நடனம் தொடர்பான இந்த 3டி படத்தை டான்ஸ் மாஸ்டர் ரெமோ டிசோசா இயக்கியுள்ளார். இதில் பிரபுதேவா தவிர, கணேஷ் ஆச்சார்யா உட்பட பல டான்ஸ் மாஸ்டர்களும் நடன கலைஞர்களும் நடித்துள்ளனர். அடுத்த மாதம் 8-ம் தேதி ரிலீஸ் ஆகும் இந்தப் படத்துக்கான புரமோஷன் வேலைகள் ஆரம்பித்துவிட்டன. இதுபற்றி இயக்குனர் ரெமோ டிசோசா கூறும்போது, ‘‘பிரபுதேவாவின் நடனத்துக்கு இந்தியா முழுவதும் ரசிகர்கள் உள்ளனர். அதனால் பட ரிலீஸுக்கு முன்பு பெங்களூர், இந்தூர், ஜெய்ப்பூர், அகமதாபாத், சென்னை உட்பட பல்வேறு நகரங்களுக்கு செல்ல இருக்கிறோம். அங்கு பங்குபெறும் இளைஞர்களுக்கு எப்படி ஈசியாக நடனம் ஆடுவது என்பது பற்றி சொல்லிக்கொடுக்க இருக்கிறோம். அதற்கான வேலைகள் போய்க்கொண்டிருக்கிறது. இதன் இரண்டாம் பாகம் எடுக்கும் எண்ணமும் இருக்கிறது. இதில் பல்வேறு நகரங்களில் உள்ள நடன கலைஞர்களுக்கு வாய்ப்பு கொடுக்க உள்ளேன். அவர்கள் ஆடியுள்ள வீடியோவை எனக்கு அனுப்பிவைக்குமாறு கேட்டுள்ளேன்’’ என்றார்.