கமல் மகா கலைஞன் தடுக்காதீர்கள்: ரஜினி உருக்கம்

என்னை வாழவைக்கும் தெய்வங்களான தமிழ் மக்களுக்கு என் வணக்கத்தை தெரிவித்துக் கொள்கிறேன். கடந்த சில நாட்களாக ‘விஸ்வரூபம்’ படப் பிரச்னைகளை அறிந்து மிகவும் வேதனைப்படுகிறேன். கமல் எனது 40 ஆண்டுகால நண்பர். யாருடைய மனதையும் புண்படுத்தும்படியாக நடந்து கொள்ளாதவர் என்பதை நன்கு அறிவேன். இத்திரைப்படம் தணிக்கையான பிறகு தியேட்டர்களில் வெளியிடுவதற்கு முன்பே, இஸ்லாமிய சகோதரர்களின் வேண்டுகோளை ஏற்று அவர்களுக்குத் திரையிட்டு காண்பித்ததில், இஸ்லாமிய சமூகத்தின் மீது கமல் கொண்டுள்ள மதிப்பும் மரியாதையும் தெள்ளத் தெளிவாகத் தெரிகிறது.

மேலும் கமல் இந்தப் படம் தயாரிக்க, சுமார் 100 கோடி ரூபாய் முதலீடு செய்வதற்கு என்னென்ன சிரமங்களை அனுபவித்திருக்கிறார் என்பதை அறியும்போது என் மனம் கலங்குகிறது. கமல் ஒரு சாதாரண கலைஞன் அல்ல. தமிழ் சினிமாவை உலக அளவில் கொண்டு செல்வதற்கு காரணமாக உள்ள மகா கலைஞன். இதையெல்லாம் மனதில் கொண்டு இந்தப் படத்தை முழுசா தடை செய்யணும் என்ற கருத்தில் இருந்து மாறி, கமல் வந்த பிறகு கலந்து பேசி கதைக்கு பாதிப்பு வராத வகையில் சரி செய்து படத்தை வெளியிட உறுதுணையாக இருக்குமாறு, மிலாது நபி வாழ்த்துக்களுடன் இஸ்லாமிய சகோதரர்களை கேட்டுக்கொள்கிறேன்.
ஜெய்ஹிந்த்.