‘நோட்டீஸ் எப்படி அனுப்பலாம்?’ : நடிகர் சங்கம் மீது விஷால் மீண்டும் தாக்கு

நடிகர் சங்கம் எனக்கு எப்படி நோட்டீஸ் அனுப்பலாம் என்று விஷால் தாக்கி உள்ளார். கமலின் ‘விஸ்வரூபம்’ படத்தை ரிலீஸ் செய்ய முஸ்லிம் அமைப்புகள் எதிர்ப்பு தெரிவித்தது. இதையடுத்து படத்தை வெளியிட அரசு தடை விதித்தது. இதுபற்றி விஷால் தனது கருத்தை டுவிட்டர் பக்கத்தில் வெளியிட்டிருந்தார். அப்போது, ‘கமல் பிரச்னையில் நடிகர் சங்கம் என்ன செய்துகொண்டிருக்கிறது’ என்ற பாணியில் கேள்வி எழுப்பி இருந்தார். இதையடுத்து நடிகர் சங்க பொதுச் செயலாளர் ராதாரவி அவருக்கு விளக்கம் கேட்டு நோட்டீஸ் அனுப்பினார். அதற்கு விஷால் பதில் அனுப்பினார். அதில் காரசாரமாக கேள்வி எழுப்பி உள்ளார். இதுபற்றி அவர் கூறியதாவது:
நடிகர் சங்கம் என்னிடம் கேட்ட எல்லா கேள்விகளுக்கும் பதில் அனுப்பி உள்ளேன்.

இப்போதும் நான் வெளியிட்ட கருத்தில் இருந்து பின்வாங்க மாட்டேன். நடிகர் சங்கம் கட்டிடம் கட்டுவது தொடர்பாக சங்க உறுப்பினர்கள் கேள்வி எழுப்பி உள்ளனர். அவர்களுக்கு ஏன் சங்கம் நோட்டீஸ் அனுப்பவில்லை. என் மீது மட்டும் சங்கம் நடவடிக்கை எடுக்க துடிப்பது ஏன்?. எந்த வகையிலும் சங்கத்தை இழிவுபடுத்தும்படி நான் கருத்து வெளியிடவில்லை. நான் ஆங்கிலத்தில் எழுதியது புரியாமலிருந்தால் அதை தமிழில் விளக்குகிறேன். ‘சமர்’ படத்தின்போது எனக்கு சம்பள பாக்கி வரவேண்டி இருந்தது. அதை பெற்றுத்தரும்படி சங்கத்தில் புகார் அளித்தேன். ஆனால் எந்த பலனும் இல்லை. எனக்கு எந்த பிரச்னை ஏற்பட்டாலும் பின்பலமாக நிற்பதாக ஏற்கனவே கமல் சார் ஒரு பத்திரிகையாளர் சந்திப்பில் சொல்லி இருக்கிறார்.