வருகிறார் சக்சேனா

ஹன்ஸ்ரா‌ஜ் சக்சேனா மீண்டும் திரைப்படத் தொழிலுக்கு வருகிறார். அடக்குமுறைக்கு அஞ்ச மாட்டோம், அதிகாரத்துக்கு கெஞ்ச மாட்டோம் என்ற கோஷம் சக்சேனாவுக்குதான் சாலப் பொருத்தம். போலீஸார் அப்படிப் போட்டு அடித்து உதைத்த பிறகும் தைரியமாக சினிமாவுக்கு வருவதென்பது சாதாரணமா.

கருணாநிதி ஆட்சியில் சன் பிக்சர்ஸின் சகலகலாவல்லவனாக வளைய வந்தவர் சக்சேனா. சினிமா விழாக்களில் இவரை புதிய மெசியாவே என்று கூவி அழைக்காதவர்கள் குறைவு. ஆட்சி மாறியதும் கோஷம் மாறியது. மெசியாவே என்றவர்கள் மோசடிக்காரன் என்றனர். வழக்குகள் குவிந்தன. இதற்காகவே காத்திருந்தது போல் போலீஸ் இவரையும், அய்யப்பன் என்பவரையும் மேலும் சிலரையும் அள்ளிச் சென்றது. நீதிமன்றத்துக்கு வெஸ்டன் டாய்லெட்டில் அமர்ந்திருக்கும போஸில் இவர்கள், ஐயோ காப்பாத்துங்க என்று கதறியபடி தவழ்ந்து வந்த காட்சி இன்னும் கண்ணுக்குள்ளேயே இருக்கிறது.

அனைத்து வழக்குகளிலும் ஒருவழியாக ஜாமின் பெற்று இப்போது பழைய நிலைக்கு திரும்பியிருக்கிறார் சக்சேனா. சன் நெட்வொர்க்கில் இப்போது எந்தப் பதவியிலும் இவர் இல்லை. இந்நிலையில் சாக்ஸ் பிக்சர்ஸ் என்ற பெய‌ரில் புதிய படநிறுவனத்தை தொடங்கியிருக்கிறார். முதலில் படங்களை வாங்கி விநியோகிக்க முடிவு செய்திருக்கிறார். இவ‌ரின் முதல் போணி ப்‌ரியாமணி நடித்திருக்கும் சாருலதா. தாய்லாந்து படமான அலோனின் அப்பட்ட காப்பி.

தாய்லாந்து போலீஸார் எப்படி? மோசமானவங்களா இல்லை ரொம்ப மோசமானவங்களா?