கேடி பில்லா கில்லாடி ரங்காவை வாங்கிய ஸ்டுடியோ கிரின்

சன் பிக்சர்ஸ் சென்ற ஆட்சியில் செய்த ரோலை ஞானவேலின் ஸ்டுடியோ கிரின் தற்போது எடுத்துக் கொண்டிருக்கிறது.

நல்ல படம், ஓடும் என்று தெரிந்தால் படம் புரெடக் ஷனில் இருக்கும் போதே அட்வான்ஸ் தந்து அமுக்கிப் போடுவதை கொள்கையாக வைத்திருக்கிறது ஸ்டுடியோ கிரின். இவர்களின் இந்த அதிரடியால் அட்டகத்தி போன்ற படங்களின் தயாரிப்பாளர்கள் லாபம் பார்த்ததுடன் படமும் பெரிய அளவில் விளம்பரப்படுத்தப்பட்டு அதில் பணியாற்றியவர்களுக்கு மீடியாவின் வெளிச்சமும் கிடைத்தது.

அடுத்த மாதம் ஸ்டுடியோ கிரின் திருப்பதி பிரதர்ஸ் தயாரித்த கும்கியை வெளியிடுகிறது. பொங்கலுக்கு அலெக்ஸ் பாண்டியன். இந்தப் படத்தை ஸ்டுடியோ கிரினே தயாரித்துள்ளது.

இந்நிலையில் பாண்டிராஜ் இயக்கி வரும் கேடி பில்லா கில்லாடி ரங்கா படத்தின் விநியோக உரிமையையும் வாங்கியிருக்கிறார்கள். விமல், சிவ கார்த்திகேயன், பிந்து மாதவி, ரெஜினா நடித்து வரும் இப்படம் ரொமாண்டிக் காமெடியாக உருவாகி வருகிறது. பாண்டிராஜின் படம் அதுவும் காமெடிப் படம் என்பதால் நிச்சயம் லாபம் என்ற நம்பிக்கையில் படப்பிடிப்பு முடியாத நிலையில் பெரும் தொகைக்கு ஞானவேல் ராஜா படத்தை வாங்கியுள்ளார்.

இந்தப் படத்துக்கு யுவன் ஷங்கர் ராஜா இசையமைத்துள்ளார். அவர் பாண்டிராஜ் படத்துக்கு இசையமைப்பது இதுவே முதல்முறை.