தலைவா - நிலவரமும் கலவரமும்

ஸ்ரீ மிஸ்‌ரி புரொடக்சன் எஸ்.சந்திரபிரகாஷ் ஜெயின் தயா‌ரிப்பில் ஏ.எல்.விஜய் இயக்கத்தில் விஜய் நடித்து வரும் தலைவா பிரமாண்டமாக தயாராகி வருகிறது. தலைவா என்ற பெயரும் போஸ்டர் டிசைனும் இது அரசியல் படமா என்ற ஐயத்தை தோற்றுவிக்கிறது. ஆனால் கதைக்கும், விஜய்யின் இமேஜுக்கும் பொருந்தக் கூடியது என்பதால் மட்டுமே இந்தப் பெயர் என விளக்கம் தந்து நழுவுகிறார்கள்.

விஜய் ஜோடி அமலா பால். இவர்களுடன் சத்யரா‌ஜ், சந்தானம், சுரேஷ், மனோரமா, பொன்வண்ணன் ஆகியோரும் நடிக்கிறார்கள்.

‌ஜி.வி.பிரகாஷ் இசையில் நா.முத்துக்குமார் எழுதிய தலைவா தலைவா என்று தொடங்கும் பாடலுக்காக மும்பையில் பிரமாண்ட அரங்கு அமைத்துள்ளனர். நடனக் கலைஞர்கள் மட்டும் 200 பேர் பங்கேற்கிறார்கள். ஜுனியர் ஆர்ட்டிஸ்ட் 500 பேர். தயா‌ரிப்பு தரப்பு சொல்லும் கணக்கைப் பார்த்தால் இந்தப் பாடலுக்கு மட்டும் பல கோடிகளை செலவழிப்பார்கள் எனத் தோன்றுகிறது.

இதுதவிர மேலும் இரண்டு பாடல்கள், மூன்று சண்டைக் காட்சிகளை முடித்துவிட்டு மார்ச் மாதம் ஸ்பெயின் செல்கிறார்கள். இவை படத்தைப் பற்றிய இப்போதைய நிலவரம். இனி கலவரம்.

அமலா பாலை இதில் ஒப்பந்தம் செய்யும் போது நீதான் ஒரே நாயகி என்று சொல்லியிருந்தாராம் இயக்குனர் விஜய். தெய்வத்திருமகளில் அனுஷ்காவுடன் நடிக்க வைத்து ஆஃப் செய்தது போல் இந்தப் படத்தில் இன்னொரு ஹீரோயின் நுழைந்துவிடக் கூடாது என்பதில் அமலா பால் கவனமாக இருந்தார். அதையும் மீறி கதைக்கு தேவை என்று மும்பையைச் சேர்ந்த பிரபல நடிகை ஒருவரை நடிக்க வைக்க இருக்கிறார்கள்.

கலவரமடைந்து போயிருக்கிறார் அமலா பால்.