இயற்கையின் பின்னணியில் பனி விழும் மலர்வனம்

பனி விழும் மலர்வனம்'. என்ற படத்தலைப்புக்கு பொருத்தமாக,கவித்துமான இயற்கை அழகு கொஞ்சும் இடங்களில் படத்தை உருவாக்கியுள்ளார்கள் . மனதுக்கும் உடலுக்கும் இதமான, புத்துணர்வு தரும் தேக்கடி, குமுளி ஆகிய மலை வாசஸ்தலங்களில் படப்பிடிப்பை நடத்தியிருக்கிறது படக்குழு. பனி விழும் மலர் வனம் படத்தை சிடிஎன் ப்ரொடக்சன்ஸ் படக்கம்பெனி தயாரிக்கிறது.

இயற்கையின் ஆற்றல் எங்கும் பரவியிருக்கிறது' என்ற புதுமையான கருவை அடிப்படையாகக் கொண்டு 'பனி விழும் மலர்வனம்' படத்தின் திரைக்கதையை அமைத்துள்ளார்கள். இயற்கை அழகை ரசிகர்களின் கண்ணுக்கு விருந்தாக்க, திரை படைப்பை பதிவு செய்ய மலைகளின் காடு, மேடு பள்ளங்களில் அட்டைகளும் மற்ற இயற்கை உயிரினங்களும் தந்த வலியைப் பொருட்படுத்தாமல், கடினமாக உழைத்ததை கூறியிருக்கிறார்கள்.

கோலிவுட்டில் ஜீவா நடித்த 'ராமேஸ்வரம்', ஜித்தன் ரமேஷ நடித்த 'நீ வேணுண்டா செல்லம்' ஆகிய படங்களில் பணியாற்றிய ஜேம்ஸ் டேவிட் இப்படத்தை இயக்கியுள்ளார்.

'சுள்ளான்', 'மனதோடு மழைக்காலம்', 'ஜனனம்' ஆகிய படங்களின் கேமராமேன் ராகன் ஒளிப்பதிவில் , இயக்குநர் ஷங்கருடன் 'நண்பன்' படத்தில் பணியாற்றிய, தமிழ் சினிமாவின் விருது பட கலை இயக்குனர் டி.முத்துராஜ் கலை இயக்கத்தில், ராஜின் இசையமைப்பில், ரவிஷங்கர் படத்தொகுப்பை கவனிக்கிறார்.

'நீதானே என் பொன் வசந்தத்தில்' நாயகனாக நடிப்பதாக இருந்த அபிலாஷ் இப்படத்தின் நாயகனாக நடிக்கிறார். 'ஒருவர் மீது இருவர் சாய்ந்து' என்ற படத்தில் நடித்த சாய்னாதான் நாயகி. பேராண்மையில் ஐந்து பெண்களில் ஒருவராக அறிமுகமாகி, சமீபத்தில் வெளியான 'நீர்ப்பறவையில்' போலீஸ் ரோலில் கவனிக்க வைத்த வர்ஷா மற்றுமொரு கதை நாயகி. இவர் தற்போது தயராகிவரும் அமைதிப்படை 2 படத்திலும் நாயகியாக நடிப்பது குறிப்பிடத்தக்கது. ரசிகர்களைச் சிரிக்க வைக்கும் பொறுப்பை நகைச்சுவை நடிகர் பாப லக்ஷ்மண் ஏற்றிருக்கிறார். இயக்குநர் ஜெகனும் ஒரு முக்கிய வேடத்தில் நடிக்கிறார்.

கண்கவரும் இடங்களில், தேர்ந்த நடிகர்கள் மற்றும் திறமையான தொழில் நுட்பக்கலைஞர்களைக் கொண்டு தயாராகிவரும் 'பனிவிழும் மலர்வனம்' ரசிகர்களின் கண்களுக்கு விருந்தாக அமைவதோடு 'Incredible India' வின் ஆச்சரியங்களைப் பறைசாற்றக்கூடிய படமாக இருக்கும் என்கிறது 'பனி விழும் மலர் வனம்' படக்குழு.