கோச்சடையான்… ரஜினி அதிருப்தியா?

எந்திரனுக்குப் பிறகு ரஜினியின் படங்கள் குறித்து வருகிற செய்திகளில் எது உண்மை எது வதந்தி என்பதே தெரியாத நிலை வந்துவிட்டது.

ராணா படத்துக்கு மட்டும்தான் எல்லாமே அதிகாரப்பூர்வமாக நடந்தது. ரஜினியே பங்கேற்றார். மற்ற படங்கள் குறித்து வரும் செய்திகளை இதுவரை அவர் உறுதிப்படுத்தவில்லை.

இதற்கிடையில்தான், கோச்சடையான் என்ற பெயரில் அனிமேஷன் படம் எடுப்பது ரஜினியை அதிருப்திக்குள்ளாக்கியிருப்பதாக செய்திகள் வெளியாகியுள்ளன.

அனிமேஷன் படத்தை விட, நிஜமான படத்தில் நடிக்க அவர் விரும்புவதாகக் கூறப்படுகிறது.

ஆனால் இந்த செய்திகளை அவரது குடும்ப பிஆர்ஓவான ரியாஸ் மறுத்துள்ளார். இதுகுறித்து அவர் சமீபத்தில் அளித்துள்ள விளக்கம்:

“ரஜினி சார் அதிருப்தி என்று வரும் செய்திகள் எல்லாமே பொய்யானவை. மார்ச் 15-ம் தேதியிலிருந்து கோச்சடையான் படப்பிடிப்பு தொடங்குகிறது. இந்த செய்திகளுக்கு அதுதான் சரியான விளக்கமாக இருக்கும். இந்தப் படத்தில் நடிப்பதில் ரஜினி சார் ஆர்வமாக உள்ளார்,” என்றார்.