பூஜை அலமாரியில் ஒரு அடி உயரம் சுவாமி சிலைகளை வைத்து வணங்கலாம் என்று சிலர் கூறுகிறார்கள். சிலர் கூடாது என்கிறார்கள். எது சரியானது. விளக்க வேண்டு கிறேன்.

மூட பக்தியுடன் இருப்பதே இறைவனை சீக்கிரம் நம்ப வைக்கிறது. படிப்பினால் ஏற்படும் பக்தி சந்தேகத்தை உண்டு பண்ணி மனதை அலைபாய வைக்கிறது. ‘அல்லலில்லை அல்லலில்லை அல்லல் என்பதில்லையே... அனைத்துமே தெய்வமென்றால் அல்லல் என்பதில்லையே...’ என்று சொல்லியிருக்கிறார்களே!

சுவாமிக்கான பூஜை இரண்டு விதம். ஆகம நூல்களில் சொல்லப்பட்டுள்ளபடி, முறையாக சிவ தீட்சை பெற்று, ஆலயத்தில் மட்டுமே செய்யப்படுகின்ற சுவாமி சிலைகளுக்கு உயர அளவு என்பது நிச்சயமுண்டு.

நாம் வீடுகளில் வைத்து அதிகமாக மந்திரம் கற்காமல், நமக்குத் தெரிந்த துதி மற்றும் பாடல்களால் வழிபடப்படும் சிலைகளுக்கு உயர அளவுகள் தேவையில்லை.

சுத்தமான பஞ்ச உலோகத்தால் செய்யப்பட்ட அதிகமான உயரமுள்ள சிலைகளை பூஜை அறை இல்லாமல் பார்வைக்காக ஹால் முதலிய இடங்களில் அலங்கரித்து வைத்துக் கொள்ளுங்கள்.

அது கொஞ்சம் ரசனையாக மனதிற்கு இதமாக இருக்கும். நிச்சயம் குடும்பத்தில் அபிவிருத்தி ஏற்படும். 3 அங்குல உயரமுள்ள பஞ்சலோக விக்ரகங்களை பூஜை அலமாரியில் வைத்து முறையான மந்திரத்துடன், அபிஷேகங்கள் செய்து வழிபடலாம். நெருப்பருகே இருப்பதுபோன்று பயமும் பக்தியும் மட்டும் வேண்டும்.

மேலும் நம்முடன் வாழ்ந்து மறைந்த தாய், தந்தை மற்றும் முன்னோரை பூஜை அலமாரியில் வைத்து வணங்கக் கூடாது. வேறு இடங்களில் வைத்து நமஸ்கரிக்கலாம்.