பாதுஷா

தேவையான பொருட்கள்:

மைதா - 1\2 கிலோ
பேக்கிங் பவுடர் - 3 சிட்டிகை
சோடா உப்பு - 1\4 டீஸ்பூன்
டால்டா - 2 1\2 கரண்டி
தண்ணீர் - 100 மி.லி.
ஏலப்பொடி - 1 டீஸ்பூன் (அரை குறையாக தூள் செய்தது)
சுடுவதற்கு தேவையான டால்டா

செய்முறை:

டால்டா, பேக்கிங் பவுடர், சோடா உப்பு, ஏலம் இவற்றை கலந்து நன்றாக கையினால் தேய்த்து கலக்கவும். பின் மைதா மாவு கலந்து தண்ணீர் விட்டு நன்றாகப் பிசையவும். பின் உருண்டையை எடுத்து ஒரே பக்கமாக சிறிது நேரம் உருட்டி, பின்பு தட்டையாக்கி நடுவில் பெருவிரலால் அமுக்கி தட்டில் செய்து வைக்கவும். விரிந்த வாணலியில் டால்டாவை சிறிதுவிட்டு சூடேற்றவும். சிறிது சூடேறியவுடன் (கையில் தொடுமளவு சூடு) வாணலியை கீழே இறக்கி பிறகு சிறிது டால்டா விடவும். செய்த பாதுஷாக்களை வாணலியில் வரிசையாக அடுக்கி அடுப்பில் தூக்கி வைக்கவும். தீ மிதமாக இருந்தால் நல்லது. பாதுஷா வடைபோல் மிதக்க ஆரம்பித்தவுடன் கம்பியினால் திரும்பி போடவும். இலேசாக சிவந்தவுடன் எடுத்து தனியாக தட்டில் ஆறவைக்கவும். வாணலியை மறுபடி அடுப்பிலிருந்து கீழே இறக்கி வைத்து, டால்டாவை ஆறவிடவும். சிறிது ஆறியதும் மறுபடி அதில் புதிய டால்டா சிறிது விடவும். உடனே பாதுஷாக்களை அதில் அடுக்கி வைத்து மறுபடி சூடேற்றவும். இவ்விதம் ஒவ்வொரு தடவையும் டால்டாவை கீழே இறக்கி ஆறவைப்பதும், புதிய டால்டா சேர்ப்பதும் மிகமிக முக்கியம். பின்பு, சினியை தண்ணீர் விட்டு இளம்பாகு காய்ச்சி, ஆறிய பாதுஷாக்களை அதில் போட்டு எடுக்கவும். இரண்டாவது தடவை அதே சீனிப் பாகை கையில் ஒட்டும் பதத்தில் காய்ச்சி, அதில் பாதுஷாக்களைப் போட்டு எடுக்கவும். பின் மூன்றாவது தடவை வெள்ளை நிறம் வரும் வரைப் பாகைக் கிளறிக் கொண்டே இருக்கவும். வெள்ளை நிறம் வந்தவுடன் மறுபடி பாதுஷாக்களை கையினால் அதில் தோய்த்து எடுத்து தட்டில் ஆறவைத்தால் மேலே வெள்ளை நிறமாக இருக்கும். அழகிற்கு கலர் தேங்காய்ப்பூ மேலே தூவலாம். நடுவில் ஆறிய சினிப்பாகை தோய்த்தவுடன் உள்ள பள்ளத்தில் முந்திரிப்பருப்போ, கிஸ்மிஸ் பழம் ஒன்றோ வைக்கலாம்.