வடிவேலு கோபம்… டைரக்டர் சமாதானம்!

அடாத மழையிலும் அனலடிக்கிறது கோடம்பாக்கம். காரணம் வடிவேலுவின் ஸ்டேட்மெண்ட்! குருசிஷ்யன் படத்தில் நான் நடிக்கலைங்க…. என்று ஓங்கி தண்டோரோ போட்டு விநியோகஸ்தர் வட்டாரத்தை மிரளடித்திருக்கிறார்.

ஷக்தி சிதம்பரம் இயக்குகிற படங்களில் கதை இருக்கிறதோ இல்லையோ, வடிவேலுவும் நமீதாவும் இருப்பார்கள் கட்டாயமாக. இவங்க இருந்தா போதும், கதை எதுக்கு? என்று விநியோகஸ்தர்களும் கண்ணை மூடிக் கொண்டு படத்தை வாங்கிக் கொண்டிருந்தார்கள். ஒருபோதும் அவர்களின் நம்பிக்கையை ஏமாற்றியதில்லை இருவரும். கைமேல் பலன் விநியோகஸ்தர்களுக்கு.

பாலில் போட்ட பணியாரத்தை காலில் போட்டு நசுக்கின மாதிரி, நமீதா இல்லாமலே ஜெயிப்பேன் என்றார் ஷக்தி சிதம்பரம் திடீரென்று. சமீபத்தில் இவர் தயாரித்த இரண்டு படங்களில் நமீதா கட்! அப்புறம் என்ன? பாலைவனத்தில் பெட்ரோல் குளியல் போட்ட மாதிரி எரிச்சலோ எரிச்சல் ரசிகர்களுக்கு. இந்த நிலையில்தான் ஆறுதலாக இருந்த வடிவேலுவுக்கும் சூட்டை கிளப்பி சுண்ணாம்பை தடவி விட்டிருக்கிறார் ஷக்தி சிதம்பரம்.

கால்ஷீட் வாங்கிய தேதிகளில் அவரை பயன்படுத்தாமலும், அதற்குரிய காரணங்களை சொல்லாமலும் இருந்துவிட்டாராம். இருந்தாலும் கைநீட்டி அட்வான்ஸ் வாங்கியாச்சு. ஒரு அழைப்பும் இல்லையே என்று விசாரித்த வடிவேலு அதிர்ந்து போனாராம். படத்தின் காமெடி காட்சிகளை ஹீரோக்களில் ஒருவரான சத்யராஜை வைத்தே எடுத்து முடித்திருக்கிறாராம் ஷக்தி. இதனால் அப்செட் ஆன வடிவேலு ஊரை கூட்டி தண்டோரா போட்டுவிட்டார்.

இப்போது சமாதானம் பேசிக் கொண்டிருக்கிறார்களாம். காமெடி சிங்கம் கருணை காட்டுமா?