பிஸியான விழாவில் பாக்யராஜின் வித்தியாச பாலிஸி!

இந்தியாவின் மிகச்சிறந்த கதை, திரைக்கதை, வசனகர்த்தா எனும் பெயரைப் பெற்ற டைரக்டர் கே.பாக்யராஜ் இப்பொழுதெல்லாம் கலந்து கொள்ளாத கோலிவுட் விழாக்களே… குறிப்பாக இசை வெளியீட்டு விழாக்களே இல்லை… எனும் அளவிற்கு தினமும் ஒன்றிரண்டு பாடல்கள் வெளியீட்டு விழாவிலாவது கலந்து கொண்டு குட்டிக் கதைகள் சொல்லி, அந்தப் படத்தின் புரமோஷனுக்கு உதவிகரமாக இருந்து வருகிறார் என்பது தெரியும்.

பாக்யராஜ் இல்லை என்றால் ஒரு படத்தின் இசை, பாடல்கள் வெளியீட்டு விழா புகைப்படங்கள் வீடியோக்களில் அன்றைய விழா நாயகரான இசையமைப்பாளரோ, இயக்குனரோ இருக்க மாட்டார் என்பது தெரியுமா? அதாகப்பட்டது…. விஐபிக்களால் நிரம்பி வழியும் மேடையில் கேசட்டை வெளியிடும் விஐபிக்களுக்கும், நடிகைகளுக்கும் தரப்படும் முன்னிலை அந்த கூட்டத்தில் சம்பந்தப்பட்ட இயக்குனருக்கும், இசையமைப்பாளருக்கும் கிடைக்காது. விழா அவசரத்தில்… கூட்டத்தினூடே மேடையில் எங்காவது ஒரு மூலையில் நிற்கும் அவர்களை ஞாபகம் வைத்து அப்பட கேசட்டை வெளியிடவோ, பெற்றுக் கொள்ளவோ செய்யும் தன் அருகே அழைத்து போட்டோவுக்கு போஸ் கொடுக்க வைப்பதை ஒரு பாலிஸியாகவே வைத்திருக்கிறார்.

சமீபத்தில் கவசம் பட ஆடியோ விழாவிலும் காணாமல் போன இசையமைப்பாளர் மரியம், இயக்குனர் எஸ்.மணிமாறன் ஆகியோரை அத்தனை கூட்டத்திலும் தேடிப்பிடித்து அருகில் நிற்க வைத்தார் டைரக்டர் பாக்யாரஜ். இவரல்லவோ விஐபி!!